ഡിഗ്രി പാസാകാത്ത വിദ്യാർഥിക്ക് പിജി അഡ്മിഷൻ നൽകിയെന്ന പരാതി: റിപ്പോർട്ട് തേടി ഗവർണർ

തിരുവനന്തപുരം: ഡിഗ്രി പാസാകാത്ത വിദ്യാർഥിക്ക് പിജിക്ക് അഡ്മിഷൻ നൽകിയെന്ന പരാതിയിൽ  ഗവർണർ റിപ്പോർട്ട് തേടി. കാലടി സംസ്കൃത സർവകലാശാലയിലെ വൈസ് ചാൻസലറോടും പരീക്ഷ കൺട്രോളറോടുമാണ് റിപ്പോർട്ട് തേടിയിരിക്കുന്നത്. അന്തിമ റിപ്പോർട്ട് വരും വരെ വിദ്യാർഥിക്ക് ബിരുദ സർട്ടിഫിക്കറ്റ് നൽകാനുള്ള കാലടി സംസ്കൃത സർവകലാശാല സിൻഡിക്കേറ്റ് തീരുമാനം ഗവർണർ മരവിപ്പിച്ചു.

ബിഎഫ്എ മ്യൂറൽ പെയിന്റിങ് ബിരുദ പരീക്ഷയിൽ പരാജയപ്പെട്ട വിദ്യാർത്ഥിക്ക് എംഎഫ്എയ്ക്ക് അഡ്മിഷൻ നൽകിയത് പരാതിക്ക് ഇടയാക്കിയിരുന്നു. ഈ വിദ്യാർത്ഥിക്ക് മുൻകാല പ്രാബല്യത്തോടെ ബിരുദ സർട്ടിഫിക്കറ്റ് നൽകാനുള്ള സിൻഡിക്കേറ്റ് തീരുമാനത്തിനെതിരെയായിരുന്നു സേവ് യൂണിവേഴ്സിറ്റി ഫോറത്തിന്റെ പരാതി.