തിരുവനന്തപുരം: സി.എം.ആർ.എൽ-എക്സാലോജിക് മാസപ്പടി ഇടപാടുമായി ബന്ധപ്പെട്ട കേസിൽ ആവേശകരമായ വിധിയാണ് സുപ്രീം കോടതിയിൽ നിന്ന് വന്നിരിക്കുന്നതെന്ന് സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ. നിയമവാഴ്ച ഉയർത്തിപ്പിടിക്കുന്ന തീരുമാനമാണ് കോടതി സ്വീകരിച്ചതെന്നും പാർട്ടി ഇതുവരെ പറഞ്ഞ കാര്യങ്ങൾ അംഗീകരിക്കുന്നതാണ് സുപ്രീം കോടതിയുടെ നിരീക്ഷണങ്ങളെന്നും അദ്ദേഹം പറഞ്ഞു.

കേസിൽ വിജിലൻസ് അന്വേഷണം തടഞ്ഞുകൊണ്ടുള്ള സുപ്രീം കോടതി ഉത്തരവിന് പിന്നാലെ മാധ്യമങ്ങളോട് സംസാരിക്കുകയായിരുന്നു അദ്ദേഹം. എഫ്.ഐ.ആർ ഇടാൻ ഉത്തരവിട്ട ഹൈക്കോടതി സിംഗിൾ ബെഞ്ചിന്റെയും, പിണറായി വിജയന്റെ ഹർജി അനുവദിക്കാതിരുന്ന ഡിവിഷൻ ബെഞ്ചിന്റെയും തീരുമാനങ്ങൾ സുപ്രീം കോടതിയിൽ വിമർശിക്കപ്പെട്ടു. അധികാരം പരിധി വിടരുതെന്നാണ് ഇ.ഡി ഉൾപ്പെടെയുള്ള അന്വേഷണ ഏജൻസികളോട് കോടതി വ്യക്തമാക്കിയിരിക്കുന്നത്.

മുഖ്യമന്ത്രി പിണറായി വിജയനെ വേട്ടയാടാൻ വേണ്ടി മാത്രം കെട്ടിച്ചമച്ച കേസാണിതെന്ന നിലപാടിൽ പാർട്ടി ഉറച്ചുനിൽക്കുന്നു. ഇത്തരം രാഷ്ട്രീയ നീക്കങ്ങളെ തുടർന്നും നിയമപരമായും രാഷ്ട്രീയമായും നേരിടുമെന്നും എം.വി. ഗോവിന്ദൻ കൂട്ടിച്ചേർത്തു.