കൊച്ചി: ചേരാനെല്ലൂരിൽ അഡീഷണൽ ജില്ലാ ജഡ്ജിയുടെ പ്രായപൂർത്തിയാകാത്ത മകൻ ഓടിച്ച ആഡംബര കാറിടിച്ച് സ്കൂട്ടർ യാത്രക്കാരൻ മരിച്ച സംഭവത്തിൽ, പ്രതിക്ക് ജാമ്യം അനുവദിച്ചതിനെതിരെയുള്ള ഹർജിയിൽ ഹൈക്കോടതി നോട്ടീസ് അയച്ചു. കൊല്ലപ്പെട്ട മാഞ്ഞാലി പുത്തൻപറമ്പിൽ ജയബാലകൃഷ്ണന്റെ (55) കുടുംബം നൽകിയ ഹർജിയിലാണ് ജസ്റ്റിസ് സി. ജയചന്ദ്രൻ നടപടി സ്വീകരിച്ചത്. സ്റ്റേഷൻ ഹൗസ് ഓഫീസർ മുഖേന പ്രതിക്ക് നോട്ടീസ് അയക്കാൻ നിർദ്ദേശിച്ച കോടതി, പബ്ലിക് പ്രോസിക്യൂട്ടറോട് സർക്കാരിന്റെ നിലപാട് അറിയിക്കാനും ആവശ്യപ്പെട്ടു. കേസ് പരിഗണിക്കുന്നത് അടുത്ത വ്യാഴാഴ്ചത്തേക്ക് (നവംബർ 19) മാറ്റിയിട്ടുണ്ട്. ഒക്ടോബർ 25-ന് പുലർച്ചെയായിരുന്നു നാടിനെ നടുക്കിയ അപകടം നടന്നത്. അഡീഷണൽ ജില്ലാ ജഡ്ജിയുടെ മകനായ 17-കാരൻ അമിതവേഗത്തിൽ ഓടിച്ച ബെൻസ് കാറിടിച്ച് തട്ടുകട ഉടമയായ ജയബാലകൃഷ്ണൻ മരിക്കുകയായിരുന്നു. അപകടത്തിന് തൊട്ടടുത്ത ദിവസം തന്നെ എറണാകുളം ജുവനൈൽ ജസ്റ്റിസ് ബോർഡ് പ്രതിക്ക് ജാമ്യം അനുവദിച്ചിരുന്നു.

ജാമ്യം നൽകിയതിനെതിരെ സംസ്ഥാന സർക്കാരും കൊല്ലപ്പെട്ടയാളുടെ കുടുംബവും നൽകിയ അപ്പീലുകൾ എറണാകുളം കുട്ടികളുടെ കോടതി നേരത്തെ തള്ളിയിരുന്നു. ജുവനൈൽ ജസ്റ്റിസ് ആക്ട് പ്രകാരം കുറഞ്ഞത് 10 വർഷം തടവ് ലഭിക്കാവുന്ന കുറ്റമല്ലാത്തതിനാൽ പ്രതിക്കെതിരെ എഫ്.ഐ.ആർ രജിസ്റ്റർ ചെയ്തത് അനാവശ്യമാണെന്നായിരുന്നു അന്ന് കോടതിയുടെ നിരീക്ഷണം. തുടർന്നാണ് ജുവനൈൽ ജസ്റ്റിസ് ബോർഡിന്റെയും കുട്ടികളുടെ കോടതിയുടെയും ഉത്തരവുകൾ ചോദ്യം ചെയ്ത് ഇരയുടെ കുടുംബം ഹൈക്കോടതിയെ സമീപിച്ചത്.

പ്രതി സ്വാധീനമുള്ള കുടുംബത്തിൽ നിന്നുള്ളയാളായതിനാൽ തെളിവുകൾ നശിപ്പിക്കാനും സാക്ഷികളെ സ്വാധീനിക്കാനും സാധ്യതയുണ്ടെന്ന് ഹർജിയിൽ ചൂണ്ടിക്കാണിക്കുന്നു. ജാമ്യം നൽകുന്നത് നീതിനിർവ്വഹണത്തെ തടസ്സപ്പെടുത്തുമെങ്കിലോ കുട്ടിയെ ധാർമ്മികമോ ശാരീരികമോ ആയ അപകടങ്ങളിലേക്ക് നയിക്കുമെങ്കിലോ ജാമ്യം നിഷേധിക്കണമെന്ന് ജെ.ജെ. ആക്ട് സെക്ഷൻ 12 വ്യക്തമാക്കുന്നുണ്ടെന്നും ഹർജിക്കാർ വാദിക്കുന്നു. അതേസമയം, കാറിന്റെ ഉടമയും കേസിലെ രണ്ടാം പ്രതിയുമായ ജഡ്ജിക്ക് ഹൈക്കോടതി നേരത്തെ മുൻകൂർ ജാമ്യം അനുവദിച്ചിരുന്നു.