കൊച്ചി: ചേരാനല്ലൂരിൽ പ്രായപൂർത്തിയാകാത്ത കുട്ടി ഓടിച്ച കാറിടിച്ച് സ്കൂട്ടർ യാത്രക്കാരൻ മരിച്ച സംഭവത്തിൽ പൊലീസിന് ഗുരുതര വീഴ്ചയെന്ന് കണ്ടെത്തിയതിനെ തുടർന്ന് എസ്.എച്ച്.ഒ ഉൾപ്പെടെ നാല് പൊലീസുകാരെ സസ്പെൻഡ് ചെയ്തു. സി.ഐ. ശ്യാംകുമാർ, എസ്.എച്ച്.ഒ. വിശ്വജിത്ത്, സി.പി.ഒ. അരുൺ, എ.എസ്.ഐ. മനോജ് എന്നിവർക്കെതിരെയാണ് നടപടി സ്വീകരിച്ചത്. മാഞ്ഞാലി സ്വദേശിയായ തട്ടുകടക്കാരൻ ജയകൃഷ്ണനാണ് അപകടത്തിൽ മരിച്ചത്. അപകടത്തിനു പിന്നാലെ കാർ ഓടിച്ചിരുന്ന ജഡ്ജിയുടെ മകനെ സ്റ്റേഷൻ ജാമ്യത്തിൽ വിട്ടയച്ചത് വലിയ ജനകീയ പ്രതിഷേധത്തിന് ഇടയാക്കിയിരുന്നു. കുടുംബത്തിന്റെ പ്രതിഷേധത്തെ തുടർന്ന് പ്രതിക്കെതിരെ കൂടുതൽ വകുപ്പുകൾ ചുമത്താൻ പൊലീസ് തീരുമാനിച്ചു.

സംഭവവുമായി ബന്ധപ്പെട്ട് എ.ഡി.ജി.പി. പി. വിജയൻ ചേരാനല്ലൂർ സ്റ്റേഷനിലെത്തി അന്വേഷണ പുരോഗതി വിലയിരുത്തുകയും അപകടസ്ഥലവും മരിച്ച ജയബാലകൃഷ്ണന്റെ വീടും സന്ദർശിക്കുകയും ചെയ്തു. ജഡ്ജിയെന്നോ പൊലീസെന്നോ വ്യത്യാസമില്ലെന്നും തെറ്റ് ചെയ്തിട്ടുണ്ടെങ്കിൽ നിയമപരമായ നടപടി എല്ലാവർക്കും ബാധകമാണെന്നും കുടുംബത്തിന് നീതി ഉറപ്പാക്കുമെന്നും എ.ഡി.ജി.പി. വ്യക്തമാക്കി. സ്റ്റേഷനിലെ സി.സി.ടി.വി. ദൃശ്യങ്ങളും റെക്കോർഡുകളും പരിശോധിച്ച ശേഷമാണ് നടപടി. കേസിന്റെ അന്വേഷണം ജില്ലാ ക്രൈംബ്രാഞ്ചിന് കൈമാറിയിട്ടുണ്ട്.

ചേരാനല്ലൂർ അപകടത്തിൽ പൊലീസിന് വീഴ്ച സംഭവിച്ചതായി ആഭ്യന്തരമന്ത്രി രമേശ് ചെന്നിത്തല നിയമസഭയിൽ വ്യക്തമാക്കിയിരുന്നു. പൊലീസ് തെറ്റ് ചെയ്തിട്ടുണ്ടെങ്കിൽ അതിനെ കണ്ണടച്ച് ന്യായീകരിക്കേണ്ട ബാധ്യത സർക്കാരിനില്ലെന്നും, ആരുടെ മകനായാലും നിയമം എല്ലാവർക്കും ഒരുപോലെയാണെന്നും മന്ത്രി കൂട്ടിച്ചേർത്തു.