മാനന്തവാടി: നേത്ര ശസ്ത്രക്രിയാ തിയറ്ററിലെ ചോർച്ചയെത്തുടർന്ന് മാനന്തവാടി ഗവൺമെന്റ് മെഡിക്കൽ കോളജ് ആശുപത്രിയിൽ രണ്ടാഴ്ചയായി തിമിര ശസ്ത്രക്രിയകൾ മുടങ്ങി. വെള്ളിനാൾ ശസ്ത്രക്രിയയ്ക്കായി എല്ലാ തയ്യാറെടുപ്പുകളും പൂർത്തിയാക്കി കാത്തിരുന്ന എഴുപത്തിമൂന്നുകാരിയായ രോഗിയെ അവസാന നിമിഷം ഓപ്പറേഷൻ നടത്താതെ മടക്കി അയച്ചതോടെ രോഗിയും ബന്ധുക്കളും സിപിഎം പ്രവർത്തകരും ചേർന്ന് മെഡിക്കൽ കോളജ് സൂപ്രണ്ടിനെ ഉപരോധിച്ചു.

കണ്ണൂർ ഇരിട്ടി സ്വദേശിനി കുമാരിയുടെ വലതുകണ്ണിലെ തിമിര ശസ്ത്രക്രിയയ്ക്കായി എത്തിയപ്പോഴാണ് ഈ ദുരവസ്ഥയുണ്ടായത്. മുൻപ് നിശ്ചയിച്ചിരുന്ന ശസ്ത്രക്രിയ ചോർച്ച മൂലം മാറ്റിവെച്ചതിനെ തുടർന്നാണ് സെപ്റ്റംബർ 25-ന് പുതിയ തീയതി നൽകിയിരുന്നത്. പ്രാഥമിക പരിശോധനകളെല്ലാം പൂർത്തിയാക്കി ശസ്ത്രക്രിയയ്ക്കുള്ള വസ്ത്രം ധരിപ്പിച്ച്, തുള്ളിമരുന്നുകളും നൽകിയ ശേഷമാണ് തിയറ്ററിനുള്ളിൽ വീണ്ടും ചോർച്ച കണ്ടെത്തിയത്. തുടർന്ന് ശസ്ത്രക്രിയ നടത്താനാകില്ലെന്ന് അറിയിച്ച ഡോക്ടർമാർ, മറ്റൊരു ആശുപത്രിയിൽ ചികിത്സ തേടാൻ നിർദ്ദേശിക്കുകയായിരുന്നു.

രോഗിയെ വലച്ചതിൽ പ്രതിഷേധിച്ച് സിപിഎം നേതാക്കളായ കെ.ടി. വിനു, എ.കെ. റൈഷാദ് എന്നിവരുടെ നേതൃത്വത്തിൽ സൂപ്രണ്ടിന്റെ ഓഫീസിന് മുൻപിൽ കുത്തിയിരുന്ന് ഉപരോധം തീർത്തു. ഒരു മണിക്കൂറോളം നീണ്ട പ്രതിഷേധത്തിനൊടുവിൽ, തിയറ്ററിലെ ചോർച്ച യുദ്ധകാലാടിസ്ഥാനത്തിൽ പരിഹരിക്കുമെന്നും മുടങ്ങിയ ശസ്ത്രക്രിയകൾ മുൻഗണന നൽകി നടത്തുമെന്നും മെഡിക്കൽ കോളജ് സൂപ്രണ്ട് ഡോ. സി.കെ. ജീവൻലാൽ ഉറപ്പുനൽകിയതോടെയാണ് സമരം അവസാനിപ്പിച്ചത്. വയനാട്, കണ്ണൂർ ജില്ലകളിലെ സാധാരണക്കാർ ആശ്രയിക്കുന്ന ആശുപത്രിയിലെ ഈ അനാസ്ഥ രോഗികൾക്കിടയിൽ കടുത്ത അമർഷത്തിന് ഇടയാക്കിയിട്ടുണ്ട്.