വിൽപനക്കെത്തിച്ച ലഹരിവസ്തുക്കളുമായി അസം സ്വദേശി അറസ്റ്റിൽ
തൃശൂർ: വിൽപനക്കെത്തിച്ച ബ്രൗൺഷുഗറും കഞ്ചാവുമായി അന്തർ സംസ്ഥാന യുവാവ് അറസ്റ്റിൽ. അസം സ്വദേശി മുക്സിദുൽ ആലോമിനെയാണ് (26) കമീഷണറുടെ കീഴിലുള്ള ലഹരി വിരുദ്ധ സ്ക്വാഡും വിയ്യൂർ പൊലീസും ചേർന്ന് പെരിങ്ങാവ് ഗാന്ധി നഗറിൽ നിന്നും അറസ്റ്റ് ചെയ്തത്.
കമീഷണർക്ക് ലഭിച്ച രഹസ്യ വിവരത്തിൽ ലഹരി വിരുദ്ധ സ്ക്വാഡ് നിരീക്ഷിക്കുകയായിരുന്നു പ്രദേശം. പരിചയമുള്ള മലയാളികൾക്ക് പുറമേ കൂടുതലായും ഹിന്ദിക്കാർ തന്നെയാണ് ഇയാളുടെ ഇടപാടുകാർ. കഴിഞ്ഞദിവസം മറ്റൊരു അസം സ്വദേശിയെ ഇളംതുരുത്തിയിൽ കോഴിക്കട നടത്തുന്നതിനിടയിൽ ബ്രൗൺ ഷുഗറുമായി പിടികൂടിയിരുന്നു. അന്വേഷണ സംഘത്തിൽ വിയ്യൂർ എസ്.ഐ കെ. വിവേക് നാരായണൻ, ലഹരി വിരുദ്ധ സ്ക്വാഡിലെ എസ്.ഐമാരായ എൻ.ജി സുവ്രതകുമാർ, കെ. ഗോപാലകൃഷ്ണൻ, പി. മോഹൻ കുമാർ എന്നിവർ ഉണ്ടായിരുന്നു.