കൊച്ചി : കേരളത്തിലെ യുവാക്കള്‍ക്കിടയില്‍, പ്രത്യേകിച്ച്‌ 18-നും 20-നും ഇടയില്‍ പ്രായമുള്ളവർക്കിടയില്‍ എയ്‌ഡ്‌സ് രോഗബാധ വർധിച്ചുവരികയാണെന്ന ആശങ്ക പങ്കുവെച്ച്‌  കൊച്ചി മേയർ വി.കെ.മിനിമോള്‍. കഴിഞ്ഞ അഞ്ചാറു വർഷത്തെ കണക്കുകള്‍ പരിശോധിക്കുമ്ബോള്‍ രോഗബാധിതരുടെ എണ്ണത്തില്‍ വലിയ വർധനവുണ്ടായതായി മേയർ പറഞ്ഞു.

യുവാക്കള്‍ക്കിടയിലെ രോഗവ്യാപനം സംബന്ധിച്ച അതീവ ഗൗരവകരമായ കണക്കുകളാണ് പുറത്തുവരുന്നത്. ഇത് കാണാതെ പോകുന്നത് വലിയ വിപത്തിന് കാരണമാകും.ആണ്‍കുട്ടികളും പെണ്‍കുട്ടികളും ഇടപഴകുന്നതില്‍ ആരും ഇടപെടുന്നില്ലെങ്കിലും, ഇത്തരം ബന്ധങ്ങളില്‍ ഒളിഞ്ഞിരിക്കുന്ന അപകടവശങ്ങളെക്കുറിച്ച്‌ അവരെ ബോധ്യപ്പെടുത്തേണ്ട സമയം അതിക്രമിച്ചിരിക്കുന്നു. രോഗം ബാധിച്ച ശേഷം പശ്ചാത്തപിച്ചിട്ട് കാര്യമില്ലെന്നും മേയർ ഓർമ്മിപ്പിച്ചു.

നഗരത്തില്‍ വർധിച്ചുവരുന്ന മസാജ് സെന്ററുകളെക്കുറിച്ചുള്ള ചോദ്യത്തിന്, ഇത്തരം സ്ഥാപനങ്ങള്‍ ഒരു ദിവസം കൊണ്ട് അടച്ചുപൂട്ടാൻ കഴിയില്ലെങ്കിലും ലൈസൻസ് നല്‍കുന്ന കാര്യത്തില്‍ ഇനി മുതല്‍ കർശനമായ നിയന്ത്രണങ്ങള്‍ ഏർപ്പെടുത്തുമെന്ന് മേയർ വ്യക്തമാക്കി.