തിരുവനന്തപുരം : നിയമസഭ തെരെഞ്ഞെടുപ്പ് വരാനിരിക്കെ സിപിഐഎം തിരുവനന്തപുരം ജില്ലാ സെക്രട്ടറിയുടെ താൽക്കാലിക ചുമതല എ.എ. റഹീം എംപിക്ക് നൽകാൻ തീരുമാനമായി. നിലവിലെ ജില്ലാ സെക്രട്ടറി വി. ജോയി നിയമസഭാ തിരഞ്ഞെടുപ്പിൽ വർക്കല മണ്ഡലത്തിൽ നിന്ന് വീണ്ടും ജനവിധി തേടുന്ന സാഹചര്യത്തിലാണ് പാർട്ടി ഈ പുതിയ ക്രമീകരണം ഏർപ്പെടുത്തിയിരിക്കുന്നത്. റഹീമിന് ചുമതല നൽകാനുള്ള ജില്ലാ സെക്രട്ടേറിയറ്റിന്റെ നിർദ്ദേശം ജില്ലാ കമ്മിറ്റി ഐകകണ്ഠ്യേന അംഗീകരിക്കുകയായിരുന്നു.

വി. ജോയിയുടെ സ്ഥാനാർത്ഥിത്വവുമായി ബന്ധപ്പെട്ട് തുടക്കത്തിൽ ചില അനിശ്ചിതത്വങ്ങൾ നിലനിന്നിരുന്നു. ജില്ലാ സെക്രട്ടറിയുടെ ചുമതലയുള്ളവർ തിരഞ്ഞെടുപ്പിൽ മത്സരിക്കേണ്ടതില്ലെന്ന പൊതുനിലപാടിലായിരുന്നു സംസ്ഥാന നേതൃത്വം. എന്നാൽ, വർക്കല സീറ്റ് നിലനിർത്താൻ വി. ജോയി തന്നെ മത്സരിക്കണമെന്ന കർശന നിലപാടിൽ തിരുവനന്തപുരം ജില്ലാ നേതൃത്വം ഉറച്ചുനിന്നു.

ജോയിയുടെ അഭാവം മണ്ഡലത്തിലെ വിജയസാധ്യതയെ ബാധിക്കുമെന്ന പ്രാദേശിക വികാരം കണക്കിലെടുത്താണ് ഒടുവിൽ സംസ്ഥാന നേതൃത്വം വിട്ടുവീഴ്ചയ്ക്ക് തയ്യാറായത്. തിരഞ്ഞെടുപ്പ് പ്രവർത്തനങ്ങൾ ഏകോപിപ്പിക്കുന്നതിനും പാർട്ടി സംവിധാനത്തെ സജ്ജമാക്കുന്നതിനും വേണ്ടിയാണ് ദേശീയ രാഷ്ട്രീയത്തിൽ സജീവമായ എ.എ. റഹീമിനെ തന്നെ ഈ നിർണ്ണായക ചുമതല ഏൽപ്പിച്ചിരിക്കുന്നത്.