വന്ദേ ഭാരത് ദക്ഷിണ-പശ്ചിമ റെയില്‍വേ സോണിന് കീഴിലുള്ള നാല് ട്രെയിനുകളുടെ സമയക്രമത്തില്‍ മാറ്റം വരുത്തി.ഹൈദരാബാദിനെയും ബെംഗളൂരുവിനെയും ബന്ധിപ്പിക്കുന്ന കാച്ചെഗുഡ – യശ്വന്ത്പൂർ സർവീസുകളുടെ സമയത്തിലാണ് പ്രധാന മാറ്റങ്ങളിലൊന്ന്.

20703 നമ്പർ കാച്ചെഗുഡ – യശ്വന്ത്പൂർ വന്ദേ ഭാരത് എക്സ്പ്രസ് ഇനി മുതല്‍ വൈകുന്നേരം 15:55-ന് ആയിരിക്കും ഹിന്ദുപൂർ സ്റ്റേഷനില്‍ എത്തിച്ചേരുക. മുൻപ് ഇത് 15:48 ആയിരുന്നു. സമാനമായി, മടക്ക സർവീസായ 20704 യശ്വന്ത്പൂർ – കാച്ചെഗുഡ വന്ദേ ഭാരത് എക്സ്പ്രസ് ഉച്ചയ്ക്ക് 12:17-ന് ഹിന്ദുപൂരില്‍ എത്തും.

കർണാടകയിലെ പ്രധാന നഗരങ്ങളെ ബന്ധിപ്പിക്കുന്ന കലബുറഗി – എസ്.എം.വി.ടി ബെംഗളൂരു വന്ദേ ഭാരത് എക്സ്പ്രസിന്റെ (22231) സമയവും പരിഷ്കരിച്ചിട്ടുണ്ട്. ഈ ട്രെയിൻ ഇനി മുതല്‍ രാവിലെ 11:13-ന് ശ്രീ സത്യസായി പ്രശാന്തി നിലയത്തില്‍ എത്തും; മുൻപ് ഇത് 11:00 മണിയായിരുന്നു. കൂടാതെ യെലഹങ്ക സ്റ്റേഷനില്‍ നേരത്തെ എത്തിയിരുന്ന 12:28-ന് പകരം ഉച്ചയ്ക്ക് 12:58-നായിരിക്കും ട്രെയിൻ ഇനി എത്തിച്ചേരുക.

മടക്കയാത്രയായ 22232 എസ്.എം.വി.ടി ബെംഗളൂരു – കലബുറഗി വന്ദേ ഭാരത് എക്സ്പ്രസ് വ്യാഴാഴ്ച ഒഴികെയുള്ള എല്ലാ ദിവസങ്ങളിലും സർവീസ് നടത്തും. ഷെഡ്യൂള്‍ ക്രമീകരണത്തിന്റെ ഭാഗമായി ഈ ട്രെയിനിന്റെയും പ്രധാന സ്റ്റേഷനുകളിലെ സമയത്തില്‍ മാറ്റം വരുത്തിയിട്ടുണ്ട്.

തിരക്കേറിയ ഇന്റർസിറ്റി റൂട്ടുകളില്‍ കൂടുതല്‍ കാര്യക്ഷമമായ സേവനം ഉറപ്പാക്കുന്നതിനാണ് ഇന്ത്യൻ റെയില്‍വേ ഈ മാറ്റങ്ങള്‍ നടപ്പിലാക്കിയിരിക്കുന്നത്. യാത്രക്കാർ യാത്രയ്ക്ക് മുൻപായി പുതുക്കിയ സമയക്രമം റെയില്‍വേ വെബ്സൈറ്റിലോ ആപ്പിലോ പരിശോധിച്ച്‌ ഉറപ്പുവരുത്തേണ്ടതാണ്.