ഇന്ത്യൻ ഇൻസ്റ്റിറ്റ്യൂട്ട് ഓഫ് ടോക്‌സിക്കോളജി റിസർച്ചിൽ ജൂനിയർ സ്റ്റെനോഗ്രാഫർ തസ്തികയിലേക്കുള്ള റിക്രൂട്ട്‌മെന്റ് ആരംഭിച്ചു. നാല് ഒഴിവുകളുണ്ട്. താൽപ്പര്യമുള്ള ഉദ്യോഗാർത്ഥികൾക്ക് ഇൻസ്റ്റിറ്റ്യൂട്ടിന്റെ ഔദ്യോഗിക വെബ്‌സൈറ്റായ iitr.res.in വഴി ഓൺലൈനായി അപേക്ഷിക്കാം. 2025 മെയ് 7-ന് ആരംഭിച്ച അപേക്ഷാ ജാലകം 2025 മെയ് 31 വരെ സജീവമായിരിക്കും.

വിദ്യാഭ്യാസ യോഗ്യത

അപേക്ഷകർ 10+2 (പന്ത്രണ്ടാം ക്ലാസ്) അല്ലെങ്കിൽ തത്തുല്യമായ യോഗ്യത നേടിയിരിക്കണം. കൂടാതെ, പേഴ്സണൽ ആൻഡ് ട്രെയിനിംഗ് വകുപ്പ് (DoPT), കൗൺസിൽ ഓഫ് സയന്റിഫിക് ആൻഡ് ഇൻഡസ്ട്രിയൽ റിസർച്ച് (CSIR) എന്നിവ നിർദ്ദേശിക്കുന്ന മാനദണ്ഡങ്ങൾക്കനുസരിച്ച് ഇംഗ്ലീഷിലോ ഹിന്ദിയിലോ ഉള്ള സ്റ്റെനോഗ്രാഫി പ്രാവീണ്യ പരീക്ഷയിൽ യോഗ്യത നേടണം.

അപേക്ഷ സമർപ്പിക്കാനുള്ള അവസാന തീയതി പ്രകാരം അപേക്ഷകരുടെ ഉയർന്ന പ്രായപരിധി 27 വയസ്സാണ്.

ശമ്പള സ്‌കെയിൽ

തിരഞ്ഞെടുക്കപ്പെടുന്ന ഉദ്യോഗാർത്ഥികൾക്ക് ഏകദേശം 50,200 രൂപ പ്രതിമാസ ശമ്പളം ലഭിക്കും. ഇതിൽ യാത്രാബത്തയും 'വൈ' കാറ്റഗറി നഗരങ്ങളിലെ കേന്ദ്ര സർക്കാർ ജീവനക്കാർക്ക് ബാധകമായ മറ്റ് ആനുകൂല്യങ്ങളും ഉൾപ്പെടുന്നു.

തിരഞ്ഞെടുപ്പ് പ്രക്രിയ

റിക്രൂട്ട്‌മെന്റ് പ്രക്രിയ രണ്ട് ഘട്ടങ്ങളായിട്ടാണ്. ഒരു എഴുത്തുപരീക്ഷയും ഒരു സ്റ്റെനോഗ്രാഫി പ്രാവീണ്യ പരീക്ഷയും ഉണ്ടായിരിക്കും.സ്റ്റെനോഗ്രാഫി പ്രാവീണ്യ പരീക്ഷയ്ക്ക് ഇംഗ്ലീഷിലോ ഹിന്ദിയിലോ മിനിറ്റിൽ 80 വാക്കുകൾ വേഗതയിൽ 10 മിനിറ്റ് ഡിക്‌റ്റേഷൻ ട്രാൻസ്‌ക്രൈബ് ചെയ്യേണ്ടതുണ്ട്.

സ്റ്റെനോഗ്രാഫി പരീക്ഷ യോഗ്യതാ സ്വഭാവമുള്ളതാണെങ്കിലും, ഇത് വിജയിക്കുന്ന ഉദ്യോഗാർത്ഥികളെ മാത്രമാണ് എഴുത്തുപരീക്ഷയിലെ പ്രകടനത്തെ അടിസ്ഥാനമാക്കിയുള്ള മെറിറ്റ് റാങ്കിംഗിനായി പരിഗണിക്കുകയുള്ളൂ. ടൈ സ്‌കോറുകൾ ഉണ്ടായാൽ, കുറഞ്ഞ നെഗറ്റീവ് മാർക്കുകൾ, ജനനത്തീയതിയിലെ പഴക്കം, ആവശ്യമായ യോഗ്യത നേരത്തെ നേടിയത്, ഉദ്യോഗാർത്ഥികളുടെ ആദ്യ പേരുകളുടെ അക്ഷരമാലാ ക്രമം തുടങ്ങിയ ഘടകങ്ങൾ അടിസ്ഥാനമാക്കിയായിരിക്കും മെറിറ്റ് ലിസ്റ്റ് നിർണ്ണയിക്കുക.

അപേക്ഷാ ഫീസ്

അപേക്ഷാ ഫോമിൽ നൽകിയിട്ടുള്ള പേയ്‌മെന്റ് ഗേറ്റ്വേ വഴി ഉദ്യോഗാർത്ഥികൾ 500 രൂപയുടെ നോൺ-റീഫണ്ടബിൾ അപേക്ഷാ ഫീസ് അടയ്ക്കണം.SC/ST/PwBD/വനിതകൾ/CSIR ജീവനക്കാർക്കും വിമുക്തഭടന്മാർക്കും ഫീസ് ഇല്ല. ഡിമാൻഡ് ഡ്രാഫ്റ്റ് അല്ലെങ്കിൽ പോസ്റ്റൽ ഓർഡറുകൾ പോലുള്ള മറ്റ് പേയ്മെന്റ് രീതികൾ സ്വീകരിക്കുന്നതല്ല