ചെന്നൈ: വിമാന ഇന്ധനത്തിന്റെ (ATF) വാറ്റ് (VAT) നികുതി ഗണ്യമായി കുറച്ച തമിഴ്‌നാട് സർക്കാരിന് കേന്ദ്ര സർക്കാരിന്റെ അഭിനന്ദനം. ചെന്നൈയിൽ വാറ്റ് നികുതി 29 ശതമാനത്തിൽ നിന്ന് 16 ശതമാനമായും, സംസ്ഥാനത്തെ മറ്റ് വിമാനത്താവളങ്ങളിൽ 1 ശതമാനമായും കുറച്ച തമിഴ്‌നാട് സർക്കാരിന്റെ നടപടിയെ കേന്ദ്ര വ്യോമയാന മന്ത്രി റാം മോഹൻ നായിഡു സ്വാഗതം ചെയ്തു.

"വിമാന ഇന്ധനത്തിന്റെ വാറ്റ് കുറയ്ക്കാനുള്ള തമിഴ്‌നാട് സർക്കാരിന്റെ തീരുമാനം തികച്ചും സ്വാഗതാർഹമായ നീക്കമാണ്. ഇതിന് മുഖ്യമന്ത്രി വിജയ്ക്ക് നന്ദി," എന്ന് കേന്ദ്രമന്ത്രി എക്സിൽ കുറിച്ചു. വിമാനയാത്ര കൂടുതൽ താങ്ങാനാവുന്നതാക്കുന്നതിൽ കേന്ദ്രവും സംസ്ഥാനങ്ങളും തമ്മിലുള്ള ഇത്തരം ഏകോപനങ്ങൾ നിർണായകമാണെന്നും, യാത്രക്കാരുടെ സൗകര്യമാണ് സർക്കാരുകളുടെ എക്കാലത്തെയും പൊതുവായ മുൻഗണനയെന്നും അദ്ദേഹം ഊന്നിപ്പറഞ്ഞു.

ഇന്ധനവില വർധനവ് വ്യോമയാന മേഖലയെ പ്രതികൂലമായി ബാധിക്കുന്ന പശ്ചാത്തലത്തിൽ, വാറ്റ് നികുതി കുറച്ചുകൊണ്ടുള്ള ഈ തീരുമാനം എയർലൈൻ കമ്പനികളുടെ പ്രവർത്തനച്ചെലവ് കുറയ്ക്കാൻ ഏറെ സഹായിക്കുമെന്നാണ് വിലയിരുത്തപ്പെടുന്നത്.