പാകിസ്ഥാനെതിരെ കടുത്ത നടപടി ; സിന്ധു നദീജല കരാര് മരവിപ്പിച്ച് ഇന്ത്യ വിജ്ഞാപനം ഇറക്കി
സിന്ധു നദീജല കരാര് ലംഘിക്കുന്നത് യുദ്ധമായി കണക്കാക്കുമെന്ന് പാകിസ്ഥാന് വ്യക്തമാക്കി
പാകിസ്ഥാന്റെ തുടര്ച്ചയായ അതിര്ത്തി കടന്നുള്ള ഭീകരവാദമാണ് കരാറില് നിന്നുള്ള പിന്മാറ്റത്തിന് കാരണമെന്ന് ഇന്ത്യ വ്യക്തമാക്കിയിട്ടുണ്ട്.
പഹല്ഗാം ഭീകരാക്രമണത്തെ തുടര്ന്ന് പാകിസ്ഥാനെതിരെയുള്ള കടുത്ത നടപടികള്ക്ക് വേഗം കൂട്ടി ഇന്ത്യ. ഇതിന്റെ ഭാഗമായി സിന്ധു നദീജല കരാര് മരവിപ്പിച്ച് ഇന്ത്യ വിജ്ഞാപനം ഇറക്കി. പാകിസ്ഥാനെ ഔദ്യോഗികമായി ഇക്കാര്യം അറിയിച്ചിട്ടുമുണ്ട്.
പാകിസ്ഥാന്റെ തുടര്ച്ചയായ അതിര്ത്തി കടന്നുള്ള ഭീകരവാദമാണ് കരാറില് നിന്നുള്ള പിന്മാറ്റത്തിന് കാരണമെന്ന് ഇന്ത്യ വ്യക്തമാക്കിയിട്ടുണ്ട്. പാകിസ്ഥാന് നടത്തിയ മറ്റ് ലംഘനങ്ങള്ക്ക് പുറമെ, കരാറില് വിഭാവനം ചെയ്തിട്ടുള്ളതുപോലെ ചര്ച്ചകളില് ഏര്പ്പെടാനുള്ള ഇന്ത്യയുടെ അഭ്യര്ത്ഥനയോട് പ്രതികരിക്കാന് പാകിസ്ഥാന് വിസമ്മതിക്കുകയും കരാര് ലംഘിക്കുകയും ചെയ്തുവെന്ന് ജലശക്തി മന്ത്രാലയത്തിന്റെ വിജ്ഞാപനത്തില് പറയുന്നു. ഈ സാഹചര്യത്തില് സിന്ധു നദീജല കരാര് തല്ക്ഷണം മരവിപ്പിക്കാന് തീരുമാനിച്ചെന്നാണ് അറിയിപ്പ്.
അതേസമയം, കടുത്ത നടപടികളിലേക്ക് ഇന്ത്യ കടന്നതിന് പിന്നാലെ പാകിസ്ഥാനും പ്രതികരിച്ചിരുന്നു. സിന്ധു നദീജല കരാര് ലംഘിക്കുന്നത് യുദ്ധമായി കണക്കാക്കുമെന്ന് പാകിസ്ഥാന് വ്യക്തമാക്കി. സിന്ധു നദീ ജല കരാര് പ്രകാരം പാകിസ്ഥാന് ലഭിക്കേണ്ട വെള്ളം വഴിതിരിച്ചുവിടാനോ തടയാനോയുള്ള ഏതൊരു നടപടിയും യുദ്ധസമാന നടപടിയായി കണക്കാക്കുമെന്നാണ് പാകിസ്ഥാന് വ്യക്തമാക്കുന്നത്. കൂടാതെ, ഇന്ത്യന് പൗരന്മാര്ക്കുള്ള വിസ പാകിസ്ഥാന് മരവിപ്പിച്ചു. ഇന്ത്യയുമായുള്ള എല്ലാ വ്യാപാര ബന്ധങ്ങലും നിര്ത്തലാക്കി. രാജ്യത്തിന്റെ പരമാധികാരം ലംഘിക്കുന്ന ഏതു നീക്കത്തിനും ശക്തമായ തിരിച്ചടിയുണ്ടാകുമെന്നാണ് പാകിസ്ഥാന് വ്യക്തമാക്കുന്നത്.