അണ്ണാ ഡിഎംകെയില് നിന്നും കൂറുമാറി ടിവികെയെ പിന്തുണച്ച എംഎല്എമാരെ മന്ത്രിസഭയില് ഉള്പ്പെടുത്തരുത്, വിജയിന്റെ പ്രതിഛായ നഷ്ടമാകുമെന്ന് കോണ്ഗ്രസ്
വിജയ് സര്ക്കാരിന്റെ സുസ്ഥിരമായ നിലനില്പ്പിന് കോണ്ഗ്രസിന്റെയും മറ്റ് സഖ്യകക്ഷികളുടെയും പിന്തുണ മാത്രം മതിയെന്ന് കാര്ത്തി ചിദംബരം വ്യക്തമാക്കി.
അണ്ണാ ഡിഎംകെയില് നിന്നുള്ള നേതാക്കള് ടിവികെ മന്ത്രിസഭയില് ഇടംപിടിക്കാന് സമ്മര്ദം ചെലുത്തുന്ന സാഹചര്യത്തിലാണ് പ്രതികരണം.
തമിഴ്നാട് രാഷ്ട്രീയത്തില് നാടകീയ നീക്കങ്ങള് തുടരുന്നതിനിടെ, ടിവികെ അധ്യക്ഷനും മുഖ്യമന്ത്രിയുമായ വിജയ്ക്ക് മുന്നറിയിപ്പുമായി കോണ്ഗ്രസ്. അണ്ണാ ഡിഎംകെയില് നിന്നും കൂറുമാറി ടിവികെയെ പിന്തുണച്ച എംഎല്എമാരെ മന്ത്രിസഭയില് ഉള്പ്പെടുത്തരുതെന്ന് കോണ്ഗ്രസ് നേതാവ് കാര്ത്തി ചിദംബരം ആവശ്യപ്പെട്ടു. വിജയിന്റെ രാഷ്ട്രീയ പ്രതിച്ഛായക്ക് ഇത് വലിയ രീതിയിലുള്ള കളങ്കമുണ്ടാക്കുമെന്നാണ് കാര്ത്തിയുടെ നിരീക്ഷണം. അണ്ണാ ഡിഎംകെയില് നിന്നുള്ള നേതാക്കള് ടിവികെ മന്ത്രിസഭയില് ഇടംപിടിക്കാന് സമ്മര്ദം ചെലുത്തുന്ന സാഹചര്യത്തിലാണ് പ്രതികരണം.
വിജയ് സര്ക്കാരിന്റെ സുസ്ഥിരമായ നിലനില്പ്പിന് കോണ്ഗ്രസിന്റെയും മറ്റ് സഖ്യകക്ഷികളുടെയും പിന്തുണ മാത്രം മതിയെന്ന് കാര്ത്തി ചിദംബരം വ്യക്തമാക്കി. അഞ്ച് വര്ഷം പൂര്ത്തിയാക്കാന് അണ്ണാ ഡിഎംകെ വിമതരുടെ ആവശ്യമില്ലെന്നും, മാറ്റത്തിനായി വോട്ട് ചെയ്ത ജനങ്ങളെ വഞ്ചിക്കുന്ന തീരുമാനങ്ങള് വിജയിന്റെ ഭാഗത്തുനിന്ന് ഉണ്ടാകരുതെന്നും അദ്ദേഹം കൂട്ടിച്ചേര്ത്തു.