തെലങ്കാനയിൽ കടുത്ത ഉഷ്ണതരംഗം ; ഒറ്റദിവസം മരിച്ചത് 22 പേർ  

 തെലങ്കാനയിൽ കടുത്ത ഉഷ്ണതരംഗം തുടരുന്നു. കുതിച്ചുയരുന്ന താപനിലയും വരണ്ട കാറ്റും കാരണം സംസ്ഥാനം അതീവ ഗുരുതരമായ സാഹചര്യത്തിലൂടെയാണ് കടന്നുപോകുന്നത്. വ്യാഴാഴ്ച ഒറ്റ ദിവസം കൊണ്ട് സംസ്ഥാനത്ത് ഉഷ്ണതരംഗവുമായി ബന്ധപ്പെട്ട കാരണങ്ങളാൽ 22 പേർ മരിച്ചു.

സംസ്ഥാന ചരിത്രത്തിൽ ആദ്യമായാണ് 20-ലധികം ജില്ലകളിൽ ഒരേ ദിവസം താപനില 46°C കടക്കുന്നത്. പെദ്ദപ്പള്ളിയിലെ മുത്താരം, സൂര്യപേട്ട് ജില്ലയിലെ മുനഗല എന്നിവിടങ്ങളിൽ 46.5°C വരെ ഉയർന്ന താപനില രേഖപ്പെടുത്തി. രാവിലെ 9 മണിക്ക് ശേഷം പുറത്തിറങ്ങാൻ കഴിയാത്ത അവസ്ഥയാണെന്ന് നാട്ടുകാർ പറയുന്നു. പുറംജോലികളിൽ ഏർപ്പെടുന്നവർ, പ്രായമായവർ, ദിവസവേതനക്കാർ എന്നിവരാണ് ഏറ്റവും കൂടുതൽ ദുരിതത്തിലായിരിക്കുന്നത്.

അവിഭക്ത വാറങ്കൽ മേഖലയിലാണ് ഏറ്റവും കൂടുതൽ മരണങ്ങൾ റിപ്പോർട്ട് ചെയ്തിരിക്കുന്നത് (9 പേർ). ഹനംകൊണ്ട, കസിപേട്ട്, മുലുഗു, ഭൂപൽപള്ളി എന്നിവിടങ്ങളിൽ ജോലിസ്ഥലത്തും അല്ലാതെയും നിരവധി ആളുകൾ ഉഷ്ണതാപം മൂലം തളർന്നുവീഴുകയും മരണപ്പെടുകയും ചെയ്തു. ഇതിനുപുറമെ മഞ്ചേരിയൽ, നൽഗൊണ്ട, യാദാദ്രി, മെദക്, കരിംനഗർ തുടങ്ങിയ ജില്ലകളിലും മരണങ്ങൾ റിപ്പോർട്ട് ചെയ്തു.

രാജസ്ഥാനിൽ നിന്നും മഹാരാഷ്ട്രയിൽ നിന്നും വീശുന്ന ചൂടുള്ള വരണ്ട കാറ്റാണ് താപനില ഉയരാൻ കാരണം. വരും ദിവസങ്ങളിലും താപനില 45°C മുതൽ 47°C വരെ ഉയരാൻ സാധ്യതയുള്ളതിനാൽ വിവിധ ജില്ലകളിൽ കാലാവസ്ഥാ നിരീക്ഷണ കേന്ദ്രം ‘റെഡ് അലർട്ട്’ പ്രഖ്യാപിച്ചു.