അയോധ്യ രാമക്ഷേത്ര നിർമ്മാണവുമായി ബന്ധപ്പെട്ട സംഭാവന പിരിവിലെ ക്രമക്കേടുകളിൽ സി.ബി.ഐ. അന്വേഷണം ആവശ്യപ്പെട്ട് സമർപ്പിച്ച ഹർജി അടിയന്തരമായി പരിഗണിക്കാൻ സുപ്രീം കോടതി വിസമ്മതിച്ചു. ജസ്റ്റിസുമാരായ എം.എം. സുന്ദ്രേഷ്, ഷീൽ നാഗു എന്നിവരടങ്ങിയ ബെഞ്ചാണ് ഹർജി തള്ളിയത്. “ആകാശം ഇടിഞ്ഞു വീഴാൻ പോകുന്നില്ല, പിന്നെന്തിനാണ് ഇത്ര തിടുക്കം?” എന്ന് കോടതി വാക്കാൽ ചോദിച്ചു.

അഭിഭാഷകരായ അജയ് കുമാർ റായ്, ദിനേശ് കുമാർ യാദവ് എന്നിവരാണ് സി.ബി.ഐ. നേതൃത്വത്തിലുള്ള പ്രത്യേക അന്വേഷണ സംഘം (എസ്.ഐ.ടി.) കേസന്വേഷിക്കണമെന്ന് ആവശ്യപ്പെട്ട് ഹർജി നൽകിയത്. അതേസമയം, സംഭവത്തിൽ അന്വേഷണം ശക്തമാക്കിയിരിക്കുകയാണ് പ്രത്യേക പൊലീസ് സംഘം. ഇതിന്റെ ഭാഗമായി ക്ഷേത്ര ട്രസ്റ്റ് മുൻ ജനറൽ സെക്രട്ടറിയും വി.എച്ച്.പി. ഉപാധ്യക്ഷനുമായ ചമ്പത് റായിയെ അന്വേഷണസംഘം വീണ്ടും ചോദ്യം ചെയ്തു.

ട്രസ്റ്റ് അംഗങ്ങളായ അനിൽ മിശ്ര, ഗോപാൽ റാവു എന്നിവരെയും കൂടുതൽ ജീവനക്കാരെയും വരുംദിവസങ്ങളിൽ ചോദ്യം ചെയ്യും. അന്വേഷണത്തിന്റെ ഭാഗമായി ബാങ്കുകൾക്കും സംഘം നോട്ടീസ് നൽകിയിട്ടുണ്ട്. കേസിൽ അറസ്റ്റിലായ എട്ടു പ്രതികളുടെ വീടുകളടക്കം പത്തിടങ്ങളിൽ നടത്തിയ റെയ്ഡിൽ കരാർ രേഖകൾ, പാസ്ബുക്കുകൾ, സ്വർണാഭരണങ്ങൾ വാങ്ങിയ ബില്ലുകൾ എന്നിവ കണ്ടെടുത്തതായാണ് റിപ്പോർട്ട്. സംഭാവനയിലെ ക്രമക്കേടുകളെക്കുറിച്ച് ട്രസ്റ്റിന് നേരത്തെ അറിവുണ്ടായിരുന്നുവെന്ന വിവരവും അന്വേഷണസംഘം പരിശോധിക്കുന്നുണ്ട്.