ന്യൂഡൽഹി: സോണിയ ഗാന്ധി എഴുതിയ 'ബിലോങ്ങിങ്: എ ജേർണി ഓഫ് ലവ്' (Belonging: A Journey of Love) എന്ന ഓർമ്മക്കുറിപ്പിനെതിരെ വിശ്വഹിന്ദു പരിഷത്തും ബി.ജെ.പിയും രൂക്ഷവിമർശനവുമായി രംഗത്തെത്തി. പുസ്തകത്തിലെ ചില ഭാഗങ്ങൾ മതവികാരം വ്രണപ്പെടുത്തുന്നുവെന്നാണ് വി.എച്ച്.പിയുടെ ആരോപണം. കോൺഗ്രസിനെ വെള്ളപൂശാനും ചരിത്രസത്യങ്ങളെ കണ്ണടച്ച് ഇരുട്ടാക്കാനുമാണ് സോണിയ ഗാന്ധി ശ്രമിക്കുന്നതെന്ന് ബി.ജെ.പി കുറ്റപ്പെടുത്തി.

തന്റെ വ്യക്തിജീവിതവും രാഷ്ട്രീയത്തിലെ നിർണായക നിമിഷങ്ങളും ആദ്യമായി തുറന്നെഴുതിയ പുസ്തകത്തിൽ ക്യാൻസറിനോട് പോരാടിയ ദിനങ്ങളെക്കുറിച്ചും അവർ വിശദീകരിക്കുന്നുണ്ട്. 2010-ൽ രണ്ടാം യു.പി.എ ഭരണകാലത്ത് ഡൽഹിയിലെ സർ ഗംഗാറാം ആശുപത്രിയിൽ നടത്തിയ പരിശോധനയിലാണ് സ്തനാർബുദം (Breast Cancer) സംശയിച്ചത്. ഇന്ത്യയിൽ ചികിത്സിച്ചാൽ മാധ്യമങ്ങളുടെ കടന്നുകയറ്റം മൂലം സ്വകാര്യത നഷ്ടപ്പെടുമെന്ന് ഭയന്ന് ചികിത്സ വിദേശത്തേക്ക് മാറ്റുകയായിരുന്നു. തുടർന്ന് ഇറ്റലി മിലാനിലെ 'യൂറോപ്യൻ ഇൻസ്റ്റിറ്റ്യൂട്ട് ഓഫ് ഓങ്കോളജി'യിൽ ഡോ. ഉംബർട്ടോ വെറോനേസിയുടെ നേതൃത്വത്തിൽ ആദ്യ ശസ്ത്രക്രിയ വിജയകരമായി പൂർത്തിയാക്കി.

ഒരു വർഷത്തിനു ശേഷം പതിവ് പരിശോധനയിൽ പാൻക്രിയാസിൽ (Pancreas) പുതിയ വളർച്ച കണ്ടെത്തിയതിനെ തുടർന്ന് നെതർലാൻഡ്‌സിലെ റോട്ടർഡാമിലുള്ള 'ഇറാസ്മസ് യൂണിവേഴ്സിറ്റി മെഡിക്കൽ സെന്ററിൽ' ഡോ. കാസ്പർ വാൻ ഐക്കിന്റെ നേതൃത്വത്തിൽ രണ്ടാമത്തെ ശസ്ത്രക്രിയയും നടന്നു. രോഗം പ്രാരംഭ ഘട്ടത്തിൽ (Precancerous stage) തിരിച്ചറിഞ്ഞതിനാൽ രണ്ടു തവണയും കീമോതെറാപ്പി ചെയ്യേണ്ടി വന്നില്ലെന്ന് അവർ വ്യക്തമാക്കി.

ദശകങ്ങളായി സ്വകാര്യ ജീവിതം രഹസ്യമായി സൂക്ഷിച്ച വ്യക്തിത്വമായിരുന്നെങ്കിലും, വ്യക്തിപരമായ നഷ്ടങ്ങൾ, അധികാര രാഷ്ട്രീയത്തിലെ വഴിത്തിരിവുകൾ, മോദിയുമായുള്ള അകൽച്ച തുടങ്ങിയ നിരവധി വിഷയങ്ങളാണ് പുസ്തകത്തിലൂടെ സോണിയ വെളിപ്പെടുത്തിയിരിക്കുന്നത്.