ബിജെപി ദേശീയ വക്താവ് ഷെഹ്സാദ് പൂനവാല പാർട്ടി സ്ഥാനങ്ങളിൽ നിന്നും പ്രാഥമിക അംഗത്വത്തിൽ നിന്നും വീണ്ടും രാജിവച്ചു    

ഡൽഹി: രാഷ്ട്രീയ കേന്ദ്രങ്ങളെയും മാധ്യമങ്ങളെയും ഒരുപോലെ ഞെട്ടിച്ചുകൊണ്ട് ബിജെപി ദേശീയ വക്താവ് ഷെഹ്സാദ് പൂനവാല പാർട്ടി സ്ഥാനങ്ങളിൽ നിന്നും പ്രാഥമിക അംഗത്വത്തിൽ നിന്നും വീണ്ടും രാജിവച്ചു. പാർട്ടി നേതൃത്വത്തിന് അദ്ദേഹം ഔദ്യോഗികമായി രാജിക്കത്ത് കൈമാറി. മുൻപ് സമർപ്പിച്ച രാജി നേതൃത്വം നിരസിക്കുകയും പുനഃപരിശോധിക്കാൻ ആവശ്യപ്പെടുകയും ചെയ്തിരുന്നെങ്കിലും, വ്യക്തിപരമായ അടിയന്തര സാഹചര്യങ്ങളും സാമ്പത്തിക കാരണങ്ങളും ചൂണ്ടിക്കാട്ടി അദ്ദേഹം തന്റെ തീരുമാനത്തിൽ ഉറച്ചുനിൽക്കുകയായിരുന്നു.

പാർട്ടിയുടെ സംഘടനാ ചുമതലകളിൽ നിന്നും ദേശീയ വക്താവ് എന്ന നിലയിലുള്ള ഔദ്യോഗിക ഉത്തരവാദിത്തങ്ങളിൽ നിന്നും പൂർണ്ണമായി ഒഴിവാക്കണമെന്ന് അദ്ദേഹം കത്തിൽ അഭ്യർത്ഥിച്ചിട്ടുണ്ട്. രാജി പ്രഖ്യാപനത്തിന് പിന്നാലെ തന്റെ സോഷ്യൽ മീഡിയ പ്ലാറ്റ്‌ഫോമായ ‘എക്സ്’ പ്രൊഫൈലിലെ ബയോ അദ്ദേഹം പുതുക്കി. ബിജെപി ദേശീയ വക്താവ് എന്ന വിവരം പൂർണ്ണമായി നീക്കം ചെയ്ത അദ്ദേഹം, പ്രധാനമന്ത്രി നരേന്ദ്ര മോദിയുടെ അനുയായിയായി ആജീവനാന്തം തുടരുമെന്ന് അതിൽ വ്യക്തമാക്കിയിട്ടുണ്ട്.

വ്യക്തിപരമായ കാരണങ്ങളാണ് രാജിക്കിടയാക്കിയതെന്ന് വ്യക്തമാക്കുമ്പോഴും, പാർട്ടിക്ക് അകത്തെ ചില സംഭവവികാസങ്ങളും വ്യക്തികളുമായുള്ള അഭിപ്രായവ്യത്യാസങ്ങളുമാണ് പെട്ടെന്നുള്ള ഈ തീരുമാനത്തിലേക്ക് നയിച്ചതെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. പാർട്ടിയുടെ സംഘടനാ സംവിധാനങ്ങളിൽ നിന്നാണ് പടിയിറങ്ങുന്നതെന്നും എന്നാൽ നരേന്ദ്ര മോദിയുടെ ആശയങ്ങൾക്കും ഭരണത്തിനും ഒപ്പം താൻ എക്കാലവും ഉണ്ടാകുമെന്നും അദ്ദേഹം വ്യക്തമാക്കിയിട്ടുണ്ട്.

2017-ൽ കോൺഗ്രസ് അധ്യക്ഷ തിരഞ്ഞെടുപ്പിലെ ക്രമക്കേടുകൾക്കെതിരെ പരസ്യമായി രംഗത്തുവന്നതിനെത്തുടർന്ന് കോൺഗ്രസ് വിട്ട ഷെഹ്സാദ് പൂനവാല, പിന്നീട് ബിജെപിയിലെത്തുകയും പാർട്ടിയുടെ ഏറ്റവും ശക്തരായ ടെലിവിഷൻ മുഖങ്ങളിൽ ഒരാളായി മാറുകയും ചെയ്യുകയായിരുന്നു. സജീവ രാഷ്ട്രീയത്തിൽ നിന്നുള്ള അദ്ദേഹത്തിന്റെ ഈ അപ്രതീക്ഷിത പിന്മാറ്റം ദേശീയ രാഷ്ട്രീയത്തിൽ വലിയ ചർച്ചകൾക്കാണ് വഴിവെച്ചിരിക്കുന്നത്.