പ്രതിഷേധങ്ങളെ കേന്ദ്ര സർക്കാർ ഉത്തരവാദിത്തത്തോടെയല്ല, മറിച്ച് ബലപ്രയോഗത്തിലൂടെയാണ് നേരിട്ടത് ; മോദി സർക്കാരിനെതിരെ രാഹുൽ ഗാന്ധി

 വിദ്യാർത്ഥി പ്രതിഷേധങ്ങൾ കൈകാര്യം ചെയ്ത രീതിയിൽ നരേന്ദ്ര മോദി സർക്കാരിനെതിരെ ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധി വിമർശനം ശക്തമാക്കി. പ്രതിഷേധങ്ങളെ കേന്ദ്ര സർക്കാർ ഉത്തരവാദിത്തത്തോടെയല്ല, മറിച്ച് ബലപ്രയോഗത്തിലൂടെയാണ് നേരിട്ടതെന്ന് അദ്ദേഹം കുറ്റപ്പെടുത്തി.

‘ദി ഹിന്ദു’ പത്രത്തിൽ എഴുതിയ ലേഖനത്തിലാണ് രാഹുൽ ഗാന്ധി സർക്കാരിനെതിരെ രൂക്ഷ വിമർശനം ഉന്നയിച്ചത്. ക്യാമ്പസുകളിലും തെരുവുകളിലും കാണുന്ന കോപം ഒരു പരീക്ഷയിലോ പ്രതിഷേധത്തിലോ ഒതുങ്ങുന്നതല്ലെന്നും, മറിച്ച് യുവ ഇന്ത്യക്കാർക്കിടയിലെ വിശ്വാസത്തിന്റെ ആഴത്തിലുള്ള പ്രതിസന്ധിയെയാണ് അത് കാണിക്കുന്നതെന്നും അദ്ദേഹം വ്യക്തമാക്കി. നീതിയും സുതാര്യതയും ആവശ്യപ്പെടുന്ന ഉദ്യോഗാർത്ഥികളുടെ കഷ്ടപ്പാടുകൾക്ക് സർക്കാർ ഉത്തരവാദിത്തം ഏറ്റെടുക്കുമോ എന്നും അദ്ദേഹം ചോദിച്ചു.

യുവാക്കളുടെ ചോദ്യങ്ങളെ ഭയപ്പെടുന്ന സർക്കാരിന് ധാർമ്മിക അധികാരം നഷ്ടപ്പെട്ടുവെന്നും, ഭരണകൂടം രാജ്യത്തിന്റെ യഥാർത്ഥ അവസ്ഥയിൽ നിന്ന് വിച്ഛേദിക്കപ്പെട്ടിരിക്കുകയാണെന്നും അദ്ദേഹം ആരോപിച്ചു. പ്രധാനമന്ത്രി മോദിയും ആഭ്യന്തരമന്ത്രി ഷായും ഉൾപ്പെടെയുള്ളവർ സ്വന്തം പ്രവൃത്തികളുടെ അനന്തരഫലങ്ങളിൽ നിന്ന് രക്ഷപ്പെടാൻ രാജ്യത്തെ യുവാക്കൾ അനുവദിക്കില്ലെന്നും, പ്രതിപക്ഷം പൂർണ്ണമായും വിദ്യാർത്ഥികൾക്കൊപ്പമുണ്ടെന്നും അദ്ദേഹം മുന്നറിയിപ്പ് നൽകി.

എന്നാൽ, വിദ്യാർത്ഥികളുടെ അസ്വസ്ഥതകൾ രാഷ്ട്രീയ നേട്ടത്തിനായി കോൺഗ്രസ് മുതലെടുക്കാൻ ശ്രമിക്കുകയാണെന്ന് ആരോപിച്ച് ബിജെപി ഈ ആരോപണങ്ങൾ തള്ളി. പരീക്ഷാ ക്രമക്കേടുകൾക്കെതിരെ അന്വേഷണം നടക്കുന്നുണ്ടെന്നും തെറ്റ് കണ്ടെത്തിയിട്ടുള്ള എല്ലാ ഇടങ്ങളിലും കർശന നടപടി സ്വീകരിച്ചിട്ടുണ്ടെന്നുമാണ് ഭരണകക്ഷിയുടെ വാദം.