മധ്യപ്രദേശില് റീല് ചിത്രീകരിക്കുന്നതിനിടെ 50 അടി ഉയരമുള്ള പാലത്തില് നിന്ന് വീണ് യുവാവിന് ദാരുണാന്ത്യം
സൂര്യാസ്തമയ സമയത്ത് പാലത്തില് വെച്ച് മൊബൈല് ഫോണില് ചിത്രങ്ങളും റീലുകളും എടുത്ത് സോഷ്യല് മീഡിയയില് പോസ്റ്റ് ചെയ്യുന്നതിനിടെ പാലത്തില് നിന്ന് വഴുതി താഴേക്ക് വീഴുകയായിരുന്നു.
മധ്യപ്രദേശിലെ റായ്സെന് ജില്ലയില് ചൊവ്വാഴ്ച വൈകുന്നേരമായിരുന്നു സംഭവം
മധ്യപ്രദേശില് മൊബൈല് ഫോണില് റീല് ചിത്രീകരിക്കുന്നതിനിടെ 50 അടി ഉയരമുള്ള പാലത്തില് നിന്ന് വീണ് യുവാവിന് ദാരുണാന്ത്യം. നൂര്നഗര് സ്വദേശിയായ മധന് നൂറിയ (25) ആണ് മരിച്ചത്. മധ്യപ്രദേശിലെ റായ്സെന് ജില്ലയില് ചൊവ്വാഴ്ച വൈകുന്നേരമായിരുന്നു സംഭവം. സൂര്യാസ്തമയ സമയത്ത് പാലത്തില് വെച്ച് മൊബൈല് ഫോണില് ചിത്രങ്ങളും റീലുകളും എടുത്ത് സോഷ്യല് മീഡിയയില് പോസ്റ്റ് ചെയ്യുന്നതിനിടെ പാലത്തില് നിന്ന് വഴുതി താഴേക്ക് വീഴുകയായിരുന്നു.
വീഴ്ചയില് യുവാവിന്റെ നട്ടെല്ല് ഒടിയുകയും തലയ്ക്ക് ഗുരുതരമായി പരിക്കേറ്റ് അബോധാവസ്ഥയിലാകുകയും ചെയ്തു. രക്തത്തില് കുളിച്ച നിലയിലായിരുന്ന യുവാവിനെ സമീപത്തെ ധാബയിലെ ജീവനക്കാര് ചേര്ന്ന് ഉടന് തന്നെ ഉദയ്പുരയിലെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
അപകടസമയത്ത് യുവാവ് റീല് എടുക്കുകയായിരുന്നു എന്ന് ഉദയപുര പൊലീസ് സ്റ്റേഷന് ഇന്-ചാര്ജ് പറഞ്ഞു. യുവാവിന്റെ മൊബൈല് ഫോണ് പരിശോധിച്ചപ്പോള്, വീഴ്ചയുടെ ദൃശ്യം ഉള്പ്പെടെ ഫോണില് ഉണ്ടായിരുന്നതായി പൊലീസ് വ്യക്തമാക്കി. സംഭവത്തില് പൊലീസ് കേസ് രജിസ്റ്റര് ചെയ്തു. ബുധനാഴ്ച രാവിലെ പോസ്റ്റ്മോര്ട്ടം നടപടികള് പൂര്ത്തിയാക്കിയ ശേഷം മൃതദേഹം കുടുംബാംഗങ്ങള്ക്ക് കൈമാറി.