ലേ: കാലാവസ്ഥാ പ്രവർത്തകനും വിദ്യാഭ്യാസ വിദഗ്ധനുമായ സോനം വാങ്ചുക്ക് സഹസ്ഥാപകനായ 'ഹിമാലയൻ ഇൻസ്റ്റിറ്റ്യൂട്ട് ഓഫ് ആൾട്ടർനേറ്റീവ്‌സ്, ലഡാക്ക്' (HIAL) ക്യാമ്പസിലെ 'ഡെസേർട്ട് ഫ്ലവർ സ്കൂളിന്റെ' പ്രവർത്തനങ്ങൾ നിർത്തിവെക്കാൻ ആവശ്യപ്പെട്ട് ലഡാക്ക് ഭരണകൂടം നോട്ടീസ് അയച്ചു. ആവശ്യമായ അനുമതികളോ എൻഒസി സർട്ടിഫിക്കറ്റോ ഇല്ലാതെയാണ് സ്കൂൾ പ്രവർത്തിക്കുന്നതെന്ന് ആരോപിച്ചാണ് ഭരണകൂടത്തിന്റെ ഈ നടപടി.

സ്ഥാപനത്തിന്റെ സഹസ്ഥാപകയും സിഇഒയുമായ ഡോ. ഗീതാഞ്ജലി ജെ. ആങ്‌മോയ്ക്കാണ് (സോനം വാങ്‌ചുക്കിന്റെ ഭാര്യ) ലേ തഹസീൽദാർ നോട്ടീസ് അയച്ചിരിക്കുന്നത്. സ്കൂളിന്റെ ഭൂമി അനുവദിച്ചതുമായി ബന്ധപ്പെട്ട കേസ് നിലവിൽ ജമ്മു കശ്മീർ-ലഡാക്ക് ഹൈക്കോടതിയുടെ പരിഗണനയിലാണ്. കേസിൽ കോടതിയുടെ അന്തിമ വിധി വരുന്നത് വരെയോ അല്ലെങ്കിൽ അടുത്ത ഉത്തരവ് ഉണ്ടാകുന്നത് വരെയോ സ്കൂളിൽ ക്ലാസുകളോ മറ്റ് പ്രവർത്തനങ്ങളോ നടത്തരുതെന്നും നിലവിലെ സ്ഥിതി കർശനമായി പാലിക്കണമെന്നും നോട്ടീസിൽ വ്യക്തമാക്കുന്നു.