ഡല്ഹി മദ്യനയക്കേസിൽ കെജരിവാളും സിസോദിയയും കുറ്റവിമുക്തര്
കുറ്റപത്രത്തില് ഇവര്ക്കെതിരെ ഒരു തെളിവും ഹാജരാക്കാന് സിബിഐക്കായിട്ടില്ലെന്നു ചൂണ്ടിക്കാട്ടിയാണ് കോടതി നടപടി.
Feb 27, 2026, 11:46 IST
ന്യൂഡല്ഹി: ഡല്ഹി മദ്യനയക്കേസില് ദില്ലി മുന് മുഖ്യമന്ത്രി അരവിന്ദ് കെജരിവാളിനെയും മുന് ഉപമുഖ്യമന്ത്രി മനീഷ് സിസോദിയയെയും കോടതി പ്രതിപ്പട്ടികയില്നിന്ന് ഒഴിവാക്കി. കുറ്റപത്രത്തില് ഇവര്ക്കെതിരെ ഒരു തെളിവും ഹാജരാക്കാന് സിബിഐക്കായിട്ടില്ലെന്നു ചൂണ്ടിക്കാട്ടിയാണ് കോടതി നടപടി. റോസ് അവന്യൂ കോടതിയിലെ സ്പെഷ്യല് ജഡ്ജി ജിതേന്ദര് സിങിന്റെതാണ് സുപ്രധാന വിധി.
കേസില് പ്രതിപ്പട്ടികയിലുണ്ടായിരുന്ന 23 പേരെയും കോടതി കുറ്റവിമുക്തരാക്കി. അന്വേഷണത്തിലെ വീഴ്ചകള് ചൂണ്ടിക്കാട്ടിയ കോടതി സിബിഐക്കെതിരെ രൂക്ഷവിമര്ശനവും നടത്തി. ആയിരത്തിലേറെ പേജുകളുള്ള കുറ്റപത്രത്തില് നിരവധി പോരായ്മകള് ഉണ്ടെന്നും സാക്ഷിമൊഴികളോ തെളിവുകളോ ഇതിനെ പിന്തുണയ്ക്കുന്നില്ലെന്നും കോടതി നിരീക്ഷിച്ചു.