മതപരിവർത്തന നിരോധന നിയമം മിശ്രവിവാഹങ്ങളെ നിരോധിക്കുന്നില്ല, പ്രായപൂർത്തിയായവർക്ക് ഒരുമിച്ച് ജീവിക്കാൻ അവകാശമുണ്ട് ; അലഹബാദ് ഹൈക്കോടതി

 അലഹബാദ്: ഉത്തർപ്രദേശിലെ 2021-ലെ നിയമവിരുദ്ധ മതപരിവർത്തന നിരോധന നിയമം മിശ്രവിവാഹങ്ങളെ നിരോധിക്കുന്നില്ലെന്ന് അലഹബാദ് ഹൈക്കോടതി. വ്യത്യസ്ത മതവിഭാഗങ്ങളിൽപ്പെട്ട ദമ്പതികൾ ഒരുമിച്ച് താമസിക്കുന്നത് തടയാൻ ഈ നിയമത്തിന് കഴിയില്ലെന്നും കോടതി വ്യക്തമാക്കി. സ്വന്തം ഇഷ്ടപ്രകാരം ദീർഘകാലമായി സമാധാനത്തോടെ കഴിയുന്ന രണ്ട് വ്യക്തികളെ ഹിന്ദുക്കളായോ മുസ്ലീങ്ങളായോ അല്ല, മറിച്ച് രണ്ട് മുതിർന്ന പൗരന്മാരായാണ് നിയമം കാണേണ്ടതെന്ന് ജസ്റ്റിസ് വിവേക് കുമാർ സിംഗ് നിരീക്ഷിച്ചു.

കുടുംബാംഗങ്ങളിൽ നിന്നോ മൂന്നാം കക്ഷികളിൽ നിന്നോ ഭീഷണിയുണ്ടെന്ന് ആരോപിച്ച് പോലീസ് സംരക്ഷണം ആവശ്യപ്പെട്ട് വിവിധ ദമ്പതികൾ സമർപ്പിച്ച 12 ഹർജികൾ പരിഗണിക്കുകയായിരുന്നു കോടതി. ഹർജിക്കാരുടെ പ്രായവും മറ്റ് വിവരങ്ങളും പരിശോധിച്ച് പരാതിയിൽ കഴമ്പുണ്ടെങ്കിൽ അവരുടെ ജീവനും സ്വാതന്ത്ര്യത്തിനും സംരക്ഷണം നൽകാൻ കോടതി പോലീസ് അധികാരികൾക്ക് നിർദ്ദേശം നൽകി.

മതം പരിഗണിക്കാതെ തന്നെ ഇഷ്ടമുള്ള വ്യക്തിയോടൊപ്പം ജീവിക്കാനുള്ള അവകാശം ഭരണഘടനയുടെ 21-ാം അനുച്ഛേദം ഉറപ്പുനൽകുന്ന ജീവിക്കാനുള്ള അവകാശത്തിന്റെയും വ്യക്തിസ്വാതന്ത്ര്യത്തിന്റെയും ഭാഗമാണെന്ന് കോടതി ഊന്നിപ്പറഞ്ഞു. “ഒരേ ലിംഗത്തിൽപ്പെട്ട വ്യക്തികൾക്ക് പോലും സമാധാനപരമായി ഒരുമിച്ച് ജീവിക്കാൻ നിയമം അനുവദിക്കുന്നുണ്ടെങ്കിൽ, പരസ്പര സമ്മതത്തോടെ കഴിയുന്ന വ്യത്യസ്ത മതസ്ഥരായ പ്രായപൂർത്തിയായവരെ തടയാൻ വ്യക്തികൾക്കോ കുടുംബത്തിനോ സർക്കാരിനോ അവകാശമില്ല,” എന്ന് കോടതി വ്യക്തമാക്കി. മതം, ജാതി, ലിംഗം എന്നിവയുടെ അടിസ്ഥാനത്തിൽ വിവേചനം പാടില്ലെന്ന് വ്യക്തമാക്കുന്ന ഭരണഘടനയുടെ 14, 15 അനുച്ഛേദങ്ങൾ ഉദ്ധരിച്ചുകൊണ്ട്, ഇത്തരം ലിവ്-ഇൻ ബന്ധങ്ങൾ കുറ്റകരമല്ലെന്നും കോടതി ഓർമ്മിപ്പിച്ചു.

നിർബന്ധപൂർവ്വം വശീകരിച്ചോ, ബലപ്രയോഗത്തിലൂടെയോ, വഞ്ചനാപരമായ മാർഗങ്ങളിലൂടെയോ മതം മാറ്റിയാൽ മാത്രമേ 2021-ലെ നിയമപ്രകാരം നടപടിയെടുക്കാൻ സാധിക്കൂ എന്ന് കോടതി ചൂണ്ടിക്കാട്ടി. വെറുമൊരു വിവാഹത്തിനോ അല്ലെങ്കിൽ ലിവ്-ഇൻ ബന്ധത്തിൽ ഏർപ്പെടുന്നതിനോ വേണ്ടി ആരെയും മതം മാറ്റാൻ നിർബന്ധിക്കാനാവില്ലെന്നും കോടതി കൂട്ടിച്ചേർത്തു.