ജയ്ഷെ ഇ മുഹമ്മദ്, ലഷ്കര് ഇ തൊയ്ബ ഭീകരകേന്ദ്രങ്ങള് തകര്ത്ത് ഇന്ത്യയുടെ ഓപ്പറേഷന് സിന്ദൂര്
ഫ്രാന്സ് നിര്മിത സ്കാല്പ് മിസൈലുകള്, ക്രൂയിസ് മിസൈലുകള് എന്നിവ സേനകള് ഉപയോഗിച്ചു
ജയ്ഷെ ഇ മുഹമ്മദ്, ലഷ്കര് ഇ തൊയ്ബ ഭീകരകേന്ദ്രങ്ങള്, പ്രധാനപ്പെട്ട പ്രസ്ഥാനങ്ങള് എന്നിവ ലക്ഷ്യമിട്ടാണ് സേനകള് ഓപ്പറേഷന് നടത്തിയത്.
പഹല്ഗാം ഭീകരാക്രമണത്തിന് ഇന്ത്യ മറുപടി നല്കിയത് വിവിധ സേനകളുടെ സംയുക്ത ഓപ്പറേഷനിലൂടെ. കര- വ്യോമ-നാവിക സേനകളുടെ സംയുക്ത നീക്കമായ 'ഓപ്പറേഷന് സിന്ദൂരി'ലൂടെയാണ് ഇന്ത്യ പാകിസ്താന് മറുപടി നല്കിയത്.
ജയ്ഷെ ഇ മുഹമ്മദ്, ലഷ്കര് ഇ തൊയ്ബ ഭീകരകേന്ദ്രങ്ങള്, പ്രധാനപ്പെട്ട പ്രസ്ഥാനങ്ങള് എന്നിവ ലക്ഷ്യമിട്ടാണ് സേനകള് ഓപ്പറേഷന് നടത്തിയത്. കൃത്യതയുള്ള ആയുധങ്ങള് ഉപയോഗിച്ചായിരുന്നു ഓപ്പറേഷന്. ഫ്രാന്സ് നിര്മിത സ്കാല്പ് മിസൈലുകള്, ക്രൂയിസ് മിസൈലുകള് എന്നിവ ഇതിനായി സേനകള് ഉപയോഗിച്ചു. രഹസ്യാന്വേഷണ വിഭാഗങ്ങള് ഈ കേന്ദ്രങ്ങളെക്കുറിച്ചുള്ള വിവരങ്ങള് മുന്പുതന്നെ ശേഖരിച്ചിരുന്നു. തുടര്ന്ന് മൂന്ന് സേനകള്ക്കും ഈ വിവരം കൈമാറി. ശേഷമാണ് സേനകള് സംയുക്തമായി ആക്രമണ പദ്ധതികള് തയ്യാറാക്കിയതും ആക്രമിച്ചതും. ഒമ്പത് കേന്ദ്രങ്ങളിലായി ഒമ്പത് മിസൈലുകളാണ് ഒരേ സമയം ഇന്ത്യ വര്ഷിച്ചത്. ഇതോടെ കനത്ത ആഘാതം ഭീകരര്ക്കുണ്ടായി.
ഭീകരരുടെ കേന്ദ്രങ്ങള് കൃത്യമായി കണ്ടെത്തിയ ശേഷമായിരുന്നു സൈന്യത്തിന്റെ തിരിച്ചടി. ജയ്ഷെ മുഹ്മദ് സ്വാധീനമേഖലയിലായിരുന്നു ആദ്യ ആക്രമണം. മസൂദ് അസറിന്റെ കേന്ദ്രവും ആക്രമിച്ചു. മുരിഡ്കയിലെ ലഷ്കര് ആസ്ഥാനവും ബഹാവല്പൂരിലെ ജയ്ഷെ ആസ്ഥാനവും ഇന്ത്യന് സൈന്യം തകര്ത്തു. ആക്രമണത്തില് 30 ഭീകരര് കൊല്ലപ്പെട്ടെന്നാണ് പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നത്. 55 ല് അധികം പേര്ക്ക് പരിക്കേറ്റുവെന്നാണ് വിവരം. മുസാഫറാഫാദിലെ ഭീകരകേന്ദ്രം ഇന്ത്യ നിലംപരിശാക്കിയിട്ടുണ്ട്.