ഇന്ദിരാഗാന്ധി നാഷണൽ ഓപ്പൺ യൂണിവേഴ്സിറ്റിയുടെ വിവിധ കോഴ്‌സുകളിൽ 2026 അധ്യയന വർഷത്തെ പുതിയ പ്രവേശനത്തിന് അപേക്ഷിക്കാനുള്ള അവസാന തീയതി നീട്ടി. ഓപ്പൺ, ഡിസ്റ്റൻസ് ലേണിംഗ് മോഡുകളിലും ഓൺലൈൻ മോഡുകളിലും സർവകലാശാല വാഗ്ദാനം ചെയ്യുന്ന ബിരുദ, ബിരുദാനന്തര ബിരുദ, ഡിപ്ലോമ പ്രോഗ്രാമുകളിലേക്ക് ജൂലൈ 31 വരെ ഉദ്യോഗാർത്ഥികൾക്ക് അപേക്ഷിക്കാം. യോഗ്യരായ ഉദ്യോഗാർത്ഥികൾക്ക് ഇഗ്നോയുടെ ഔദ്യോഗിക പ്രവേശന പോർട്ടൽ വഴി അപേക്ഷകൾ സമർപ്പിക്കാവുന്നതാണ്. അപേക്ഷാ ഫോം പൂരിപ്പിക്കുമ്പോൾ തെറ്റുകൾ വരാതിരിക്കാൻ പ്രവേശന മാർഗ്ഗനിർദ്ദേശങ്ങൾ പൂർണ്ണമായി വായിച്ചു മനസ്സിലാക്കണമെന്ന് സർവകലാശാല അധികൃതർ അറിയിച്ചു.

അപേക്ഷ സമർപ്പിക്കേണ്ടത് എങ്ങനെ?

ഇഗ്നോയുടെ ഔദ്യോഗിക പ്രവേശന പോർട്ടൽ സന്ദർശിക്കുക.

ലോഗിൻ വിവരങ്ങൾ സൃഷ്ടിക്കുന്നതിനായി നിലവിൽ ഉപയോഗിക്കുന്ന ഇമെയിൽ വിലാസവും മൊബൈൽ നമ്പറും നൽകി ആദ്യം പുതിയ അക്കൗണ്ട് രജിസ്റ്റർ ചെയ്യുക.

ലഭിച്ച യൂസർനെയിമും പാസ്‌വേഡും ഉപയോഗിച്ച് പോർട്ടലിൽ ലോഗിൻ ചെയ്യുക.

നിങ്ങളുടെ വ്യക്തിവിവരങ്ങളും അക്കാദമിക് യോഗ്യതകളും നൽകി ഓൺലൈൻ അപേക്ഷാ ഫോം പൂരിപ്പിക്കുക.

നിശ്ചിത സൈസിലുള്ള പാസ്‌പോർട്ട് സൈസ് ഫോട്ടോ, ഒപ്പ്, യോഗ്യതാ സർട്ടിഫിക്കറ്റുകൾ എന്നിവ സ്കാൻ ചെയ്ത് അപ്‌ലോഡ് ചെയ്യുക.

വിവരങ്ങളെല്ലാം കൃത്യമാണെന്ന് ഉറപ്പുവരുത്തിയ ശേഷം ക്രെഡിറ്റ് കാർഡ്, ഡെബിറ്റ് കാർഡ് അല്ലെങ്കിൽ നെറ്റ് ബാങ്കിംഗ് വഴി അപേക്ഷാ ഫീസ് അടയ്ക്കുക.

അപേക്ഷ വിജയകരമായി സമർപ്പിച്ചതിന് ശേഷം കൺഫർമേഷൻ പേജ് ഡൗൺലോഡ് ചെയ്ത് പ്രിന്റ് എടുത്ത് സൂക്ഷിക്കുക.

അപേക്ഷകർ ശ്രദ്ധിക്കേണ്ട പ്രധാന കാര്യങ്ങൾ

പ്രവേശനവുമായി ബന്ധപ്പെട്ട എല്ലാ അറിയിപ്പുകളും ഇമെയിൽ വഴിയായതിനാൽ അപേക്ഷകരുടെ സജീവമായ ഇമെയിൽ വിലാസം തന്നെ നൽകണം. രജിസ്ട്രേഷൻ സമയത്ത് മൊബൈലിൽ ഒടിപി ലഭിച്ചില്ലെങ്കിൽ പോർട്ടലിലെ ‘Resend OTP’ സംവിധാനം ഉപയോഗിക്കുക. സുഗമമായ ഓൺലൈൻ അപേക്ഷയ്ക്ക് ഗൂഗിൾ ക്രോമിന്റെ ഏറ്റവും പുതിയ പതിപ്പ് ഉപയോഗിക്കാൻ ശ്രദ്ധിക്കുക. ബാച്ചിലർ ഓഫ് കൊമേഴ്‌സ്, ബിസിഎ, ബാച്ചിലർ ഓഫ് സോഷ്യൽ വർക്ക്, ബിടിടിഎം, എംബിഎ, എംസിഎ, എംകോം തുടങ്ങിയ ജനപ്രിയ ബിരുദ-ബിരുദാനന്തര കോഴ്‌സുകൾക്ക് പുറമെ ജേണലിസം, ഡിജിറ്റൽ മീഡിയ, ഇൻഫർമേഷൻ ടെക്നോളജി, പോഷകാഹാര ശാസ്ത്രം തുടങ്ങിയ മേഖലകളിലെ വൈവിധ്യമാർന്ന ഡിപ്ലോമ, സർട്ടിഫിക്കറ്റ് കോഴ്‌സുകളും ഇഗ്നോ വാഗ്ദാനം ചെയ്യുന്നുണ്ട്.