ഗുജറാത്ത്‌ : ഗുജറാത്തിലെ ബനസ്‌കന്ത ജില്ലയില്‍ ഭർത്താവ് യുവതിയെ 50,000 രൂപയ്ക്ക് സുഹൃത്തുക്കള്‍ക്ക് വിറ്റു. ഇരയെ 10 ദിവസത്തേക്ക് തുടർച്ചയായി ബലാത്സംഗത്തിനും പീഡനത്തിനും വിധേയയാക്കി എന്ന് പോലീസ് കണ്ടെത്തല്‍.

മെയ് 11ന് ഭാര്യയെ പാലൻപൂർ നഗരത്തില്‍ നിന്ന് കാണാതായതായി ഭർത്താവ് പരാതി നല്‍കിയതായി ഡെപ്യൂട്ടി പോലീസ് സൂപ്രണ്ട് ജിഗ്നേഷ് ഗാമിത് പറഞ്ഞു. എന്നാല്‍, പരാതി നല്‍കി രണ്ട് ദിവസത്തിനുള്ളില്‍ അദ്ദേഹത്തെയും കാണാതായി. അദ്ദേഹത്തിന്റെ തിരോധാനം പാലൻപൂർ ഈസ്റ്റ് പോലീസ് സ്റ്റേഷനില്‍ മറ്റൊരു പരാതി രജിസ്റ്റർ ചെയ്യാൻ കാരണമായി.

പ്രാഥമിക അന്വേഷണത്തില്‍ ഭർത്താവ് ഭാര്യയെ സുഹൃത്തുക്കള്‍ക്ക് 50,000 രൂപയ്ക്ക് വിറ്റതായി കണ്ടെത്തി. പ്രതികള്‍ തന്നെ ആവർത്തിച്ച്‌ ബലാത്സംഗം ചെയ്യുകയും ലൈംഗികമായി പീഡിപ്പിക്കുകയും ചെയ്തതായി ഇര പോലീസിനോട് പറഞ്ഞു. തന്റെ ആഭരണങ്ങള്‍ ബലമായി കൈക്കലാക്കി പ്രാദേശിക ജ്വല്ലറികള്‍ക്ക് വിറ്റതായും അവർ ആരോപിച്ചു.

യുവതിയുടെ മൊഴിയുടെ അടിസ്ഥാനത്തില്‍, പാലൻപൂർ വെസ്റ്റ് പോലീസ് സ്റ്റേഷനില്‍ ബലാത്സംഗം, മനുഷ്യക്കടത്ത്, ക്രിമിനല്‍ ഗൂഢാലോചന തുടങ്ങിയ വകുപ്പുകള്‍ പ്രകാരം കേസ് രജിസ്റ്റർ ചെയ്തു. കേസില്‍ ഭർത്താവ് ഉള്‍പ്പെടെ ഏഴ് പേരെ അറസ്റ്റ് ചെയ്തതായി പോലീസ് പറഞ്ഞു.പ്രധാന പ്രതിക്ക് ക്രിമിനല്‍ ചരിത്രമുണ്ടെന്നും അന്വേഷണ ഉദ്യോഗസ്ഥർ കണ്ടെത്തി.