ചോദ്യപേപ്പർ ചോർച്ച തടയുന്നതിനുള്ള നിയമഭേദഗതി ബിൽ അവതരിപ്പിച്ചു

ഡൽഹിയിലെ പൊലീസ് അതിക്രമത്തിൽ ആഭ്യന്തര മന്ത്രി അമിത് ഷായ്‌ക്കെതിരെ പ്രതിപക്ഷം ശക്തമായ പ്രതിഷേധം തുടരുന്നതിനിടയിൽ, ചോദ്യപേപ്പർ ചോർച്ച തടയുന്നതിനുള്ള നിയമഭേദഗതി ബിൽ സർക്കാർ ലോക്‌സഭയിൽ അവതരിപ്പിച്ചു. ബില്ലിന്മേലുള്ള ചർച്ച ആരംഭിക്കുന്നതിന് മുൻപ് പൊലീസ് അതിക്രമത്തിൽ ആഭ്യന്തര മന്ത്രി പ്രസ്താവന നടത്തണമെന്നായിരുന്നു പ്രതിപക്ഷത്തിന്റെ ആവശ്യം. എന്നാൽ ബഹളം രൂക്ഷമായതിനെത്തുടർന്ന് പാർലമെന്റിന്റെ ഇരുസഭകളും ഉച്ചയ്ക്ക് രണ്ട് മണി വരെ നിർത്തിവെച്ചു.

പാർലമെന്റ് മാർച്ച് നടത്തിയ വിദ്യാർത്ഥികളെ പൊലീസ് അതിക്രൂരമായി നേരിട്ട സംഭവത്തിൽ അമിത് ഷാ മറുപടി പറയണമെന്ന് ആവശ്യപ്പെട്ട് ലോക്‌സഭയിലും രാജ്യസഭയിലും പ്രതിപക്ഷം നടുത്തളത്തിലിറങ്ങി പ്രതിഷേധിച്ചു. ഈ കോലാഹലങ്ങൾക്കിടയിലാണ് കേന്ദ്ര പേഴ്‌സണൽ കാര്യ മന്ത്രി ജിതേന്ദ്ര സിംഗ് ലോക്‌സഭയിൽ നിയമഭേദഗതി ബിൽ അവതരിപ്പിച്ചത്.

ബില്ലിൽ ചർച്ച ആരംഭിക്കാൻ സ്പീക്കർ ഓം ബിർള ആവശ്യപ്പെട്ടെങ്കിലും പ്രതിപക്ഷം വഴങ്ങിയില്ല. തുടർന്ന് ലോക്‌സഭ രണ്ട് മണിവരെ പിരിയുകയായിരുന്നു. വിദ്യാർത്ഥികളെ റോഡിലൂടെ വലിച്ചിഴച്ച് തല്ലിച്ചതക്കുകയാണ് പൊലീസ് ചെയ്തതെന്ന് രാജ്യസഭയിൽ പ്രതിപക്ഷ നേതാവ് മല്ലികാർജുൻ ഖാർഗെ കുറ്റപ്പെടുത്തി. വിദ്യാർത്ഥി സമരത്തെ ചോരയിൽ മുക്കാനാണ് പൊലീസ് ശ്രമിച്ചതെന്ന് ജോൺ ബ്രിട്ടാസും രൂക്ഷമായി വിമർശിച്ചു.

ഇതിനിടെ, പ്രതിഷേധങ്ങളുമായി ബന്ധപ്പെട്ട് സുപ്രീം കോടതിയുടെയും നിർണായക ഇടപെടലുകളുണ്ടായി. പ്രതിഷേധിക്കാനുള്ള അവകാശം നിഷേധിക്കാനാവില്ലെന്ന് കോടതി വ്യക്തമാക്കിയിട്ടുണ്ട്. അയോധ്യ രാമക്ഷേത്ര വിഷയം, ഇ20 പെട്രോൾ തുടങ്ങിയ വിഷയങ്ങളിൽ കേന്ദ്ര സർക്കാരിനെതിരെ പ്രതിപക്ഷം പ്രതിഷേധം ശക്തമാക്കാൻ ഒരുങ്ങുകയാണ്. ഇതിന്റെ ഭാഗമായി ‘ഇ20 ജനത പാർട്ടി’ (ഇജെപി) എന്ന പേരിൽ സമൂഹ മാധ്യമങ്ങളിൽ കൂട്ടായ്മകൾ ആരംഭിച്ചിട്ടുണ്ട്. എക്സ്, ഇൻസ്റ്റഗ്രാം എന്നിവയിൽ അക്കൗണ്ടുകൾ തുടങ്ങിയിട്ടുണ്ടെങ്കിലും ഇതിന് പിന്നിൽ ആരെന്ന് വ്യക്തമല്ല. എഥനോൾ കലർത്തിയ പെട്രോൾ കാരണം വാഹനങ്ങൾക്കുണ്ടാകുന്ന പ്രശ്നങ്ങളെ കുറിച്ചുള്ള പോസ്റ്റുകളും, ‘ശുദ്ധമായ പെട്രോൾ വാങ്ങാനുള്ള അവകാശത്തിനായി പോരാട്ടം’ എന്ന മുദ്രാവാക്യവുമാണ് ഇവർ പ്രധാനമായും ഉയർത്തിക്കാട്ടുന്നത്.