ചെന്നൈ: തമിഴ്‌നാട്ടില്‍ ഓട്ടോറിക്ഷാ ചാര്‍ജ് ഉയര്‍ത്തി. മിനിമം ചാര്‍ജ് 25 രൂപയില്‍ നിന്ന് ഇരട്ടിയായി 50 രൂപയാക്കി. ആദ്യത്തെ 1.8 കിലോമീറ്ററിന് 50 രൂപയും തുടര്‍ന്നുള്ള ഓരോ കിലോമീറ്ററിനും 25 രൂപയുമാണ് പുതിയ നിരക്ക്.

ഓട്ടോ വെയിറ്റിങ് ചാര്‍ജായി മിനിറ്റിന് ഒരു രൂപയും രാത്രി 10 മുതല്‍ പുലര്‍ച്ചെ 5 വരെ സാധാരണ നിരക്കിന്റെ ഒന്നര ഇരട്ടിയുമാണ് ഈടാക്കുക. ചുരം റോഡുകളിലെ യാത്രയ്ക്ക് അടിസ്ഥാന നിരക്ക് 60 രൂപയും തുടര്‍ന്നുള്ള ഓരോ കിലോമീറ്ററിനും 30 രൂപയുമായിരിക്കും.നിരക്ക് വര്‍ധിപ്പിക്കണമെന്ന ഓട്ടോ തൊഴിലാളി സംഘടനകളുടെ ദീര്‍ഘകാല ആവശ്യത്തെ തുടര്‍ന്നാണ് നടപടി

2013 ഓഗസ്റ്റില്‍ നിശ്ചയിച്ച നിരക്കുകള്‍ക്കാണ് ഇപ്പോള്‍ മാറ്റം വന്നിരിക്കുന്നത്. ഇന്ധനം, ഇന്‍ഷുറന്‍സ്, അറ്റകുറ്റപ്പണി തുടങ്ങിയ ചെലവുകള്‍ വര്‍ധിച്ചതും ആപ്പ് അധിഷ്ഠിത ടാക്‌സി സേവനങ്ങളില്‍ നിന്നുള്ള മത്സരവുമാണ് നിരക്ക് പരിഷ്‌കരിക്കണമെന്ന ആവശ്യത്തിന് പിന്നില്‍. തമിഴ്‌നാട്ടിലെ ഏകദേശം 3.46 ലക്ഷം ഓട്ടോറിക്ഷകള്‍ക്കും പുതിയ നിരക്ക് ബാധകമാകും.