ഇറാനെതിരായ ആക്രമണം ; ആഗോള സാമ്പത്തിക-വ്യാപാര മേഖലകളെ പ്രതികൂലമായി ബാധിക്കുമെന്ന് രാജ്നാഥ് സിംഗ്
പശ്ചിമേഷ്യയിൽ യുദ്ധം കനക്കുന്ന സാഹചര്യത്തിൽ ആഴത്തിലുള്ള ആശങ്ക പ്രകടിപ്പിച്ച് പ്രതിരോധ മന്ത്രി രാജ്നാഥ് സിംഗ്. മേഖലയിൽ ഇപ്പോൾ നടക്കുന്നത് അസാധാരണമായ സംഭവങ്ങളാണെന്നും ഇത് ആഗോള സാമ്പത്തിക-വ്യാപാര മേഖലകളെ പ്രതികൂലമായി ബാധിക്കുമെന്നും അദ്ദേഹം മുന്നറിയിപ്പ് നൽകി. നമ്മുടെ അയൽപക്കത്തോ പശ്ചിമേഷ്യയിലോ അടുത്തതായി എന്ത് സംഭവിക്കുമെന്ന് പ്രവചിക്കാൻ കഴിയാത്ത അനിശ്ചിതാവസ്ഥയാണ് നിലവിലുള്ളതെന്നും ‘സാഗർ സങ്കൽപ്’ കോൺക്ലേവിൽ സംസാരിക്കവെ അദ്ദേഹം ചൂണ്ടിക്കാട്ടി.
കടലുകൾ കേവലം വ്യാപാര മാർഗ്ഗങ്ങൾ മാത്രമല്ല, മറിച്ച് ആഗോള ശക്തിയുടെ നിർണ്ണായക കേന്ദ്രങ്ങളായി മാറിക്കൊണ്ടിരിക്കുകയാണെന്ന് അദ്ദേഹം പറഞ്ഞു. ഇസ്രയേൽ-ഇറാൻ സംഘർഷത്തിന്റെ പശ്ചാത്തലത്തിൽ സമുദ്രങ്ങളുടെ തന്ത്രപരമായ പ്രാധാന്യം വർദ്ധിച്ചിട്ടുണ്ട്. മുൻകാലങ്ങളിൽ സമുദ്രങ്ങളെ വാണിജ്യ ആവശ്യങ്ങൾക്കായി മാത്രമാണ് കണ്ടിരുന്നതെങ്കിൽ, ഇന്നത്തെ സാഹചര്യത്തിൽ അവ നയതന്ത്രപരവും സൈനികവുമായ ശക്തികേന്ദ്രങ്ങളായി മാറിയിരിക്കുകയാണെന്നും പ്രതിരോധ മന്ത്രി കൂട്ടിച്ചേർത്തു.