ഡൽഹി : ഉത്തരേന്ത്യയിൽ വായുമലിനീകരണം രൂക്ഷമാകുന്ന സാഹചര്യത്തിൽ മലിനീകരണം മൂലമുണ്ടാകുന്ന ആരോഗ്യപ്രശ്നങ്ങൾ കണ്ടെത്താൻ കേന്ദ്ര ആരോഗ്യ മന്ത്രാലയം പുതിയ നടപടികൾ ആരംഭിച്ചു. ആശുപത്രികളിൽ എത്തുന്ന രോഗികളിൽ ശ്വാസകോശ സംബന്ധമായ അസുഖങ്ങളും ഹൃദയസംബന്ധമായ പ്രശ്നങ്ങളും പരിശോധിച്ച് കൃത്യമായ വിവരങ്ങൾ രേഖപ്പെടുത്താനാണ് സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും നിർദേശം നൽകിയിരിക്കുന്നത്.

പുതിയ നിർദേശമനുസരിച്ച് പ്രത്യേക ശ്വാസകോശ-ഹൃദയാരോഗ്യ ക്ലിനിക്കുകൾ രോഗികളുടെ വിവരങ്ങൾ ദിവസേന രേഖപ്പെടുത്തണം. രോഗങ്ങളുടെ സ്വഭാവം തിരിച്ചറിയാൻ ലോകാരോഗ്യ സംഘടനയുടെ അംഗീകൃത രോഗവർഗീകരണ രീതിയും ഉപയോഗിക്കും. ജില്ലാ, സംസ്ഥാന ആരോഗ്യവകുപ്പുകൾ വഴി വിവരങ്ങൾ ദേശീയ രോഗനിയന്ത്രണ കേന്ദ്രത്തിലേക്ക് കൈമാറുകയും ചെയ്യും.

വായുമലിനീകരണം കുട്ടികൾക്കും പ്രായമായവർക്കും ആസ്ത്മ, ശ്വാസകോശ രോഗങ്ങൾ എന്നിവയുള്ളവർക്കും കൂടുതൽ അപകടസാധ്യത സൃഷ്ടിക്കാം. അതിനാൽ മലിനീകരണം കൂടുതലുള്ള സമയങ്ങളിൽ പുറത്തുള്ള പ്രവർത്തനങ്ങൾ കുറയ്ക്കുകയും ഡോക്ടർ നിർദേശിച്ച മരുന്നുകൾ കൃത്യമായി ഉപയോഗിക്കുകയും വേണം. ആശുപത്രികളിൽ രോഗികളുടെ വിവരങ്ങൾ ശേഖരിക്കുന്നതിലൂടെ മലിനീകരണവും ആരോഗ്യപ്രശ്നങ്ങളും തമ്മിലുള്ള ബന്ധം കൂടുതൽ വ്യക്തമായി മനസ്സിലാക്കാൻ കഴിയുമെന്നാണ് പ്രതീക്ഷ.