ഡൽഹി : രാജ്യതലസ്ഥാനമായ ഡൽഹിയിൽ വായുമലിനീകരണം വീണ്ടും അപകടകരമായ നിലയിലേക്ക് ഉയർന്നു. നഗരത്തിലെ വായുഗുണനിലവാര സൂചിക 331 വരെ ഉയർന്നതോടെ ജനജീവിതം കൂടുതൽ പ്രതിസന്ധിയിലായി. ചില പ്രദേശങ്ങളിൽ മലിനീകരണത്തിന്റെ തോത് അതീവ ഗുരുതരമായ നിലയിലെത്തിയിട്ടുണ്ട്.

ജഹാംഗീർപുരിയിൽ വായുഗുണനിലവാര സൂചിക 449 രേഖപ്പെടുത്തിയതായും നോയിഡയിലെ വിവിധ മേഖലകളിലും മലിനീകരണം 300 കടന്നതായും റിപ്പോർട്ടുകളുണ്ട്. വാഹനങ്ങളിൽ നിന്നുള്ള പുകയും പൊടിപടലങ്ങളും കൃഷിയിടങ്ങളിലെ അവശിഷ്ടങ്ങൾ കത്തിക്കുന്നതും പ്രതികൂല കാലാവസ്ഥയും മലിനീകരണം വർധിക്കാൻ കാരണങ്ങളായി ചൂണ്ടിക്കാണിക്കപ്പെടുന്നു.

സ്ഥിതിഗതികൾ നിയന്ത്രിക്കുന്നതിനായി ഡൽഹി-എൻസിആർ മേഖലയിൽ ഗ്രേഡഡ് റെസ്‌പോൺസ് ആക്ഷൻ പ്ലാനിന്റെ രണ്ടാം ഘട്ട നിയന്ത്രണങ്ങൾ നടപ്പിലാക്കി. വായുമലിനീകരണം കുട്ടികൾക്കും പ്രായമായവർക്കും ശ്വാസകോശ സംബന്ധമായ പ്രശ്നങ്ങളുള്ളവർക്കും കൂടുതൽ ബുദ്ധിമുട്ടുണ്ടാക്കാൻ സാധ്യതയുണ്ട്. അതിനാൽ അനാവശ്യമായ പുറംപ്രവർത്തനങ്ങൾ കുറയ്ക്കാനും മലിനീകരണ നിയന്ത്രണ നിർദേശങ്ങൾ പാലിക്കാനും അധികൃതർ നിർദേശിക്കുന്നു.