പോഷക മൂല്യങ്ങളാൽ സമ്പുഷ്ടമാണ് മധുരക്കിഴങ്ങ്. മധുരക്കിഴങ്ങിന്റെ തൊലി നീക്കുന്നതോടെ നല്ലൊരു ശതമാനം പോഷകങ്ങൾ നഷ്ടപ്പെടും. ഇതാണ് പലർക്കും അറിയാത്ത കാര്യവും. ബദാം കുതിർത്തു കഴിക്കുന്നവരും ഇതേ അബദ്ധം തന്നെയാണ് കാണിക്കുന്നത്. അതായത് തൊലിയിലാണ് നാരുകൾ ഉള്ളതെന്ന കാര്യം അറിയാതെയാണ് പലരും തൊലി കളയുന്നത്. പക്ഷേ മണ്ണിനടയിലിൽ വളരുന്ന മധുരക്കിഴങ്ങ് വൃത്തിയായി കഴുകിയെടുത്ത് മാത്രമേ ഉപയോഗിക്കാവു…

നാരുകൾ അടങ്ങിയ മധുരക്കിഴങ്ങിന്റെ തൊലി കഴിച്ചാൽ അത് കുടലിന്റെ നല്ല ബാക്ടീരികളെ പ്രോത്സാഹിപ്പിക്കുകയും ദഹനത്തെ മെച്ചപ്പെടുത്തുകയും ചെയ്യും. ആരോഗ്യകരമായ ഗട്ട് മൈക്രോബയോം നിലനിർത്താനും രക്തത്തിലെ പഞ്ചസാരയും കൊളസ്‌ട്രോളും നിയന്ത്രിക്കാനും ഇവയുടെ തൊലി കഴിക്കുന്നത് സഹായിക്കും. തൊലി നീക്കം ചെയ്താൽ ആന്റിഓക്‌സിഡന്റ് അളവു കുറയ്ക്കും. ബീറ്റാ കരോട്ടിൻ, ക്ലോറോജെനിക് ആസിഡ്, വിറ്റാമിനുകൾ സി, ഇ എന്നിവയും ഇതിൽ സമ്പുഷ്ടമാണ്.

ആന്തോസയാനിൻ എന്ന ആന്റിഓക്സിഡന്റുകളുണ്ട് പർപ്പിൾ മധുരക്കിഴങ്ങിൽ. കോശങ്ങളുടെ കേടുപാടുകൾ തടയാൻ സഹായിക്കുന്നതിനൊപ്പം ഹൃദ്രോഗം, കാൻസർ തുടങ്ങിയ രോഗങ്ങളുടെ അപകടസാധ്യത കുറയ്ക്കാനും ഇത് ബെസ്റ്റാണ്.