പണ്ട് മുതല്‍ക്കേ കറികളിലും, വെള്ളം തിളപ്പിക്കാനുമെല്ലാമായി നമ്മള്‍ ഉപയോഗിച്ചു വരുന്ന ഒരു സുഗന്ധവ്യഞ്ജനമാണ് ഗ്രാമ്പൂ. എന്നാൽ, ദിവസവും ഗ്രാമ്പൂ ചേർത്ത വെള്ളം കുടിച്ചാൽ ശരീരത്തില്‍ അദ്ഭുതകരമായ മാറ്റങ്ങൾ സംഭവിക്കുമെന്ന് വിദഗ്ദ്ധർ പറയുന്നു. ഇതേക്കുറിച്ച് ഇന്‍സ്റ്റഗ്രാമില്‍ ഡോക്ടര്‍ മനീഷ മിശ്ര പങ്കുവച്ച കാര്യങ്ങള്‍ നമുക്കൊന്ന് നോക്കാം. 

ഗ്രാമ്പൂവിന്റെ രുചിക്ക് എരിവും രൂക്ഷമായ ഗന്ധവുമുണ്ടെങ്കിലും, ആയുർവേദ പ്രകാരം ഇതിന് ശരീരത്തെ തണുപ്പിക്കുന്ന സ്വഭാവമുണ്ട്. ഇത് ശരീരത്തിലെ പിത്ത, കഫദോഷങ്ങളെ സന്തുലിതമാക്കാൻ സഹായിക്കുന്നു.

ഗ്രാമ്പൂ വെള്ളം ദിവസവും കുടിക്കുന്നത് വഴി ലഭിക്കുന്ന പ്രധാന ആരോഗ്യ ഗുണങ്ങൾ ഇവയാണ്:

- പല ഭക്ഷണ പദാർത്ഥങ്ങളെക്കാളും ഏറ്റവും ഉയർന്ന ആന്‍റി ഓക്‌സിഡന്‍റ് ശേഷി (ORAC Value) ഗ്രാമ്പൂവിനുണ്ട്. ഗ്രാമ്പൂവിലെ പ്രധാന ആന്റിഓക്‌സിഡന്റായ യൂജെനോൾ ശരീരത്തിന് വളരെ നല്ലതാണ്. ഇത് ശരീരത്തിലെ ഫ്രീ റാഡിക്കലുകളെ ചെറുക്കാൻ സഹായിക്കുന്നു, അതുവഴി രോഗപ്രതിരോധശേഷി വർദ്ധിപ്പിക്കുന്നു.

- ശക്തമായ ഔഷധഗുണങ്ങളുള്ളതിനാൽ, ഗ്രാമ്പൂ ചേർത്ത വെള്ളം സാധാരണ വെള്ളത്തേക്കാൾ വേഗത്തിൽ ദാഹം ശമിപ്പിക്കാനും ശരീരത്തിന് ഉന്മേഷം നൽകാനും സഹായിക്കും.

- വയറ്റിലെ അമിതമായ ഗ്യാസും വീർപ്പും ദഹനക്കേടും പോലെ, ദഹന സംബന്ധമായ പല പ്രശ്നങ്ങളും പരിഹരിക്കാൻ ഈ പാനീയത്തിന് കഴിവുണ്ട്.

- ഗ്രാമ്പൂവിന് സ്വാഭാവികമായ ചുമ ശമിപ്പിക്കാനുള്ള കഴിവുണ്ട്. പതിവായി ഗ്രാമ്പൂ വെള്ളം കുടിക്കുന്നത് കഫക്കെട്ട്, ചുമ എന്നിവ കുറയ്ക്കുന്നതിനും, ശ്വാസകോശ സംബന്ധമായ ആരോഗ്യത്തിനും ഗുണം ചെയ്യും. തണുപ്പുള്ള കാലാവസ്ഥയിൽ ശ്വാസകോശ സംബന്ധമായ പ്രശ്നങ്ങൾക്ക് ഇത് മികച്ച പ്രതിവിധിയാണ്.

- ഗ്രാമ്പൂവിന് ആൻറിമൈക്രോബിയൽ ഗുണങ്ങൾ ഉള്ളതിനാൽ ഇത് ഭക്ഷണശേഷം കുടിക്കുന്നത് വായിലെ ദുർഗന്ധം അകറ്റാനും ബാക്ടീരിയകളെ നശിപ്പിക്കാനും സഹായിക്കുന്നു.

- ഇറിറ്റബിൾ ബവൽ സിൻഡ്രോം പോലുള്ള ദഹനനാള സംബന്ധമായ പ്രശ്നങ്ങൾക്കും ഇത് ആശ്വാസം നൽകാൻ സാധ്യതയുണ്ട്.

എങ്ങനെ ഉപയോഗിക്കണം?

ഗ്രാമ്പൂ രാത്രി മുഴുവൻ വെള്ളത്തിൽ ഇട്ടുവെച്ച് രാവിലെ ആ വെള്ളം കുടിക്കുകയോ, അല്ലെങ്കിൽ തിളപ്പിച്ചാറിയ വെള്ളത്തിൽ ഗ്രാമ്പൂ ഇട്ട് കുടിക്കുകയോ ചെയ്യാം. ഇത് ദൈനംദിന ആരോഗ്യ ശീലത്തിന്റെ ഭാഗമാക്കാൻ ഡോക്ടർ മനീഷ മിശ്ര ഉപദേശിക്കുന്നു.

ഗ്രാമ്പൂ എങ്ങനെ സൂക്ഷിക്കാം

 ഗ്രാമ്പൂ വായു കടക്കാത്ത ഒരു പാത്രത്തിൽ തണുത്ത ഇരുണ്ട സ്ഥലത്ത് സൂക്ഷിക്കുക. ശരിയായി സൂക്ഷിച്ചാൽ ഗ്രാമ്പൂ ഒരു വർഷത്തേക്ക് നന്നായി സൂക്ഷിക്കാനാകും; ഏകദേശം മൂന്ന് മാസത്തിനുശേഷം ഗ്രാമ്പൂ വാടിപ്പോകും.  ഗ്രാമ്പൂവിന്റെ പുതുമ നഷ്ടപ്പെടുന്നതായി നിങ്ങൾ കണ്ടെത്തുകയാണെങ്കിൽ, ഒന്നോ രണ്ടോ മിനിറ്റ് നേരം ചെറിയ തീയിൽ വറുത്തെടുക്കാവുന്നതാണ്.