മഴക്കാലം എത്തുന്നതോടെ വളർത്തുനായ്ക്കളുടെ ആരോഗ്യപരിപാലനത്തിൽ കൂടുതൽ ശ്രദ്ധ ആവശ്യമാണ്. ഈ സമയത്ത് ഏറ്റവും കൂടുതലായി കണ്ടുവരുന്ന പ്രശ്നങ്ങളിലൊന്നാണ് ചെള്ളുശല്യം. ചൂടും ഈർപ്പവുമുള്ള അന്തരീക്ഷം ചെള്ളുകൾ അതിവേഗം പെരുകാൻ അനുകൂലമായതിനാൽ അവ നായ്ക്കളുടെ ശരീരത്തിൽ എളുപ്പത്തിൽ പറ്റിപ്പിടിക്കുകയും വിവിധ ആരോഗ്യപ്രശ്നങ്ങൾക്ക് കാരണമാകുകയും ചെയ്യുന്നു. അതിനാൽ ഈ കാലയളവിൽ ശ്രദ്ധിക്കേണ്ട പ്രധാന കാര്യങ്ങൾ അറിയാം.

നായ്ക്കൾ ശരീരം അമിതമായി ചൊറിയുകയോ നക്കുകയോ ചെയ്യുക, ചർമ്മത്തിൽ ചുവപ്പ് നിറവും അസ്വസ്ഥതയും കാണിക്കുക, ഭക്ഷണത്തോടുള്ള വിമുഖത, ക്ഷീണം, പനി എന്നിവ ചെള്ളുകടിയേറ്റതിന്റെയോ അത് വഴിയുണ്ടാകുന്ന രോഗങ്ങളുടെയോ ലക്ഷണങ്ങളാകാം. നായ്ക്കളിൽ കാണുന്ന ഈ ചെള്ളുകൾ മനുഷ്യരിലേക്കും രോഗങ്ങൾ പടർത്താൻ സാധ്യതയുള്ളതിനാൽ കൃത്യമായ മുൻകരുതലുകൾ എടുക്കേണ്ടത് അത്യാവശ്യമാണ്.

വീട്ടുപറമ്പിലെയും ഗാർഡനിലെയും പുല്ലുകൾ കൃത്യമായി വെട്ടിമാറ്റി സൂക്ഷിക്കുക. പരിസരം എപ്പോഴും ഉണങ്ങിയതും വൃത്തിയുള്ളതുമായി നിലനിർത്തുന്നത് ചെള്ളുകളുടെ സാന്നിധ്യം കുറയ്ക്കും.

ഉയരമുള്ള പുല്ലുകൾ, കാടുകൾ, ഈർപ്പമുള്ള സ്ഥലങ്ങൾ എന്നിവ ചെള്ളുകളുടെ പ്രധാന പ്രജനന കേന്ദ്രങ്ങളാണ്. നായ്ക്കളെ നടത്താൻ കൊണ്ടുപോകുമ്പോൾ ഇത്തരം സ്ഥലങ്ങൾ ഒഴിവാക്കി, കൃത്യമായ പാതകളിലൂടെ മാത്രം നടത്തുക.

ഡോക്ടറുടെ നിർദ്ദേശപ്രകാരം സ്പോട്ട്-ഓൺ ട്രീറ്റ്മെന്റുകൾ, ആന്റി-ടിക് ഷാംപൂകൾ, സ്പ്രേകൾ, പൗഡറുകൾ, മെഡിക്കേറ്റഡ് കോളറുകൾ അല്ലെങ്കിൽ ഗുളികകൾ എന്നിവ ഉപയോഗിക്കുക. ചെള്ളുകൾ കൂടാൻ സാധ്യതയുള്ള മഴക്കാലത്തും ഉഷ്ണകാലത്തും ഇവ കൃത്യമായി നൽകണം.

വളർത്തുമൃഗങ്ങളുടെ ബെഡ്ഡിംഗ്, പുതപ്പുകൾ, കളിപ്പാട്ടങ്ങൾ എന്നിവ കൃത്യമായ ഇടവേളകളിൽ കഴുകി വൃത്തിയാക്കുക. വീടിനുള്ളിലെ കാർപെറ്റുകളും ഫർണിച്ചറുകളും വാക്വം ചെയ്യുന്നത് വഴി ഒളിച്ചിരിക്കുന്ന ചെള്ളുകളെ ഇല്ലാതാക്കാം.

നായ്ക്കളുടെ ചെവിയുടെ പിന്നിൽ, കോളറിനടിയിൽ, കാൽവിരലുകൾക്കിടയിൽ, വാലിന് ചുറ്റുമുള്ള ഭാഗങ്ങളിൽ എന്നിവിടങ്ങളിലാണ് സാധാരണയായി ചെള്ളുകൾ ഒളിച്ചിരിക്കുന്നത്. പുറത്തു കൊണ്ടുപോയി വന്നതിന് ശേഷം നായ്ക്കളുടെ ശരീരം കൃത്യമായി പരിശോധിക്കുക. ദിവസവും രോമങ്ങൾ ചീകി വൃത്തിയാക്കുന്നത് വഴി ചെള്ളുകൾ പെരുകുന്നത് ആദ്യമേ തടയാൻ സാധിക്കും.