കുറച്ചുനേരം ഇരുന്ന് ജോലി ചെയ്തശേഷം എഴുന്നേൽക്കുമ്പോൾ നടുവിന് ഒരു വലിച്ചിൽ, നിവർന്നു നിൽക്കാൻ ചെറിയൊരു പ്രയാസം… ഇന്നത്തെ യുവാക്കൾക്കിടയിൽ പോലും ഇത് അപരിചിതമായ അനുഭവമല്ല. നടുവേദന പ്രായമായവരെ മാത്രം ബാധിക്കുന്ന പ്രശ്‌നമാണെന്ന ധാരണ ഇപ്പോഴും പലർക്കുമുണ്ട്. എന്നാൽ മാറിയ ജീവിതശൈലിയും മണിക്കൂറുകളോളം ഇരുന്നുള്ള ജോലിയും ചെറുപ്പക്കാരിലും നടുവേദന വർധിക്കാൻ കാരണമാകുന്നുണ്ട്. അതിനാൽ, നിസ്സാരമെന്ന് കരുതി ഈ ലക്ഷണങ്ങളെ അവഗണിക്കുന്നത് ശരിയാണോ? 

ഇരുപതുകളിലും മുപ്പതുകളിലും പ്രായമുള്ള യുവാക്കളിൽ നടുവേദന വർധിച്ചുവരുന്നതായി പഠനങ്ങൾ പറയുന്നു. നമ്മുടെ നിത്യജീവിതത്തിലെ ചെറിയ ശീലങ്ങൾ എങ്ങനെയാണ് നട്ടെല്ലിനെ ബാധിക്കുന്നതെന്ന് പഠനം വ്യക്തമാക്കുന്നു. മണിക്കൂറുകളോളം ഡെസ്‌കിൽ കുനിഞ്ഞിരുന്ന് ജോലി ചെയ്യുന്നത് നട്ടെല്ലിന് അമിതഭാരമുണ്ടാക്കുന്നു. ഇത് നട്ടെല്ലിന് താങ്ങേകുന്ന പേശികളെ ദുർബലപ്പെടുത്തുകയും കാലക്രമേണ ഡിസ്‌കുകളിൽ തേയ്മാനം സംഭവിക്കാൻ കാരണമാകുകയും ചെയ്യും.

ചലനങ്ങളില്ലാത്ത ജീവിതശൈലി നട്ടെല്ലിന്റെ പ്രവർത്തനത്തെ ദോഷകരമായി ബാധിക്കും. പേശികൾ ബലഹീനമാകുമ്പോൾ ചെറിയ ജോലികൾ പോലും നടുവേദനയ്ക്ക് കാരണമാകും. ജിമ്മിൽ പോകുന്ന യുവാക്കൾ ശരിയായ മാർഗനിർദേശങ്ങളില്ലാതെ വ്യായാമം ചെയ്യുന്നത് നട്ടെല്ലിന് ഗുരുതരമായ പരിക്കുകൾ ഉണ്ടാക്കാം. ഇത് പേശിവലിവ് മുതൽ ഡിസ്‌ക് തകരാറുകൾ വരെ എത്തിച്ചേക്കാം. ശരീരത്തിന്റെ മധ്യഭാഗത്തുള്ള അമിതഭാരം നട്ടെല്ലിന്റെ സ്വാഭാവികമായ ബാലൻസ് തെറ്റിക്കുന്നു. ഇത് നടുഭാഗത്ത് സ്ഥിരമായ സമ്മർദ്ദം ചെലുത്തുകയും തേയ്മാനം വേഗത്തിലാക്കുകയും ചെയ്യുന്നു. സമ്മർദ്ദം കൂടുമ്പോൾ പേശികളിൽ പിരിമുറുക്കം ഉണ്ടാകുന്നു. വേണ്ടത്ര ഉറക്കം ലഭിക്കാത്തത് ശരീരത്തിന് സ്വയം സുഖപ്പെടാനുള്ള അവസരം നഷ്ടപ്പെടുത്തുകയും ചെയ്യുന്നു.

മൂന്നോ നാലോ ആഴ്ചയിൽ കൂടുതൽ നീണ്ടുനിൽക്കുന്ന വേദന. വേദന കാലുകളിലേക്ക് വ്യാപിക്കുന്നു. ശരീരഭാഗങ്ങളിൽ മരവിപ്പ്, തരിപ്പ് അല്ലെങ്കിൽ ബലഹീനത അനുഭവപ്പെടുക. രാത്രിയിൽ വേദന മൂലം ഉറക്കം തടസ്സപ്പെടുക. കാരണമില്ലാതെ ശരീരഭാരം കുറയുക. ഭൂരിഭാഗം നടുവേദനകളും ജീവിതശൈലി മാറ്റങ്ങളിലൂടെ പരിഹരിക്കാവുന്നതേയുള്ളൂ. എന്നാൽ ഈ പറയുന്ന ലക്ഷണങ്ങൾ കണ്ടാൽ ഒട്ടും വൈകാതെ വിദഗ്ധ ചികിത്സ തേടണം.