പെട്ടെന്ന് ദേഷ്യം വരുന്നതും മനസ്സ് അസ്വസ്ഥമാകുന്നതും കേവലം സ്വഭാവത്തിന്റെ പ്രശ്നമാണെന്ന് കരുതി നിങ്ങൾ സമാധാനിക്കാറുണ്ടോ? എങ്കിൽ തെറ്റി. ഇടയ്ക്കിടെയുണ്ടാകുന്ന ഈ ദേഷ്യവും അസ്വസ്ഥതയും നിങ്ങളുടെ ഉള്ളിൽ ഒളിഞ്ഞിരിക്കുന്ന ഉയർന്ന രക്തസമ്മർദം (Hypertension) എന്ന രോഗത്തിന്റെ ലക്ഷണമാകാം.'നിശ്ശബ്ദ കൊലയാളി' എന്ന് വിശേഷിപ്പിക്കപ്പെടുന്ന ഈ രോഗം പലപ്പോഴും ലക്ഷണങ്ങൾ പ്രകടമാക്കാതെയാണ് നമ്മുടെ ശരീരത്തെ തകർക്കുന്നത്.

നിങ്ങൾ ദേഷ്യപ്പെടുമ്പോൾ ശരീരം സ്ട്രെസ്സ് ഹോർമോണുകളെ വൻതോതിൽ പുറന്തള്ളുന്നു; ഇത് ഹൃദയമിടിപ്പ് വർദ്ധിപ്പിക്കുകയും രക്തധമനികളിൽ അമിത സമ്മർദ്ദം ചെലുത്തുകയും ചെയ്യുന്നു. ഈ അവസ്ഥ തുടരുന്നത് ഹൃദയാരോഗ്യത്തെ ഗുരുതരമായി ബാധിച്ചേക്കാം. അതുകൊണ്ട്, നിങ്ങളുടെ ദേഷ്യത്തെ വെറുമൊരു 'മൂഡ് ഓഫ്' ആയി കാണാതെ ശരീരത്തിന്റെ ഒരു അപായസൂചനയായി തിരിച്ചറിയേണ്ടതുണ്ട്. നിങ്ങൾ ദേഷ്യപ്പെടുമ്പോൾ ശരീരം സ്ട്രെസ്സ് ഹോർമോണുകളുടെ പുറന്തള്ളുകയും ഇത് ഹൃദയമിടിപ്പ് വേഗത്തിലാകാൻ കാരണമാകുകയും ചെയ്യും.

ഇതുമൂലം രക്തക്കുഴലുകൾ സങ്കോചിക്കുകയും രക്തസമ്മർദം ഉയരുകയും ചെയ്യും. എന്നാൽ ഇത് ശീലമാകുകയാണെങ്കിൽ ദീർഘകാലത്തേക്ക് ക്ഷതങ്ങൾക്ക് സാധ്യതയുണ്ട്. മധ്യവയസ്സുള്ളവർക്കാണ് ഉയർന്ന രക്തസമ്മർദം വരാനുള്ള സാധ്യത കൂടുതൽ. ഹോർമോൺ വ്യതിയാനങ്ങൾ, ജോലി സമ്മർദം, വീട്ടിലെ ചുമതലകൾ, ജീവിതശൈലി എന്നിവയാണ് രോഗസാധ്യത കൂട്ടുന്നത്. ഉയർന്ന രക്തസമ്മർദം പരിശോധിക്കാതിരുന്നാൽ അത് ഹൃദ്രോഗം, പക്ഷാഘാതം, വൃക്കയിലെ പ്രശ്നങ്ങൾ ഇവയ്ക്കുള്ള സാധ്യത കൂട്ടും. ജീവിതശൈലീരോഗമായ ഉയർന്ന രക്തസമ്മർദം പൂർണമായും ഭേദമാക്കാനാവില്ലെങ്കിലും നല്ല മാറ്റം വരുത്താൻ സാധിക്കും. ഇതിനായി ജീവിതശൈലിയിൽ വരുത്തേണ്ട മാറ്റങ്ങൾ എന്തൊക്കെ എന്നറിയാം. 

∙ ഈറ്റ് സ്മാർട്ട് : പഴങ്ങൾ, പച്ചക്കറികൾ, മുഴുധാന്യങ്ങൾ, കൊഴുപ്പു കുറഞ്ഞ പാലുൽപ്പന്നങ്ങൾ എന്നിവ ഭക്ഷണത്തിൽ ഉൾപ്പെടുത്തുക. പ്രോസസ് ചെയ്ത ഭക്ഷണങ്ങളുടെയും ഉപ്പിന്റെയും ഉപയോഗം കുറയ്ക്കുക. 
∙ വ്യായാമം : മിതമായ അളവിലെങ്കിലും ശാരീരികപ്രവർത്തനങ്ങളിൽ ഏർപ്പെടണം. ബ്രിസ്ക് വോക്കിങ്ങ്, സൈക്ലിങ്ങ് ഇവ ചെയ്യാം. 
∙ സമ്മർദം നിയന്ത്രിക്കാം : ശ്വസനവ്യായാമങ്ങൾ, ധ്യാനം ഇവ പരിശീലിക്കാം. അല്ലെങ്കിൽ ശാന്തിയും സമാധാനവും സന്തുലനവും നൽകുന്ന ഇഷ്ടവിനോദങ്ങളിലേർപ്പെടാം. 
∙ മദ്യപാനം നിയന്ത്രിക്കാം : മദ്യപാനവും കഫീന്റെ ഉപയോഗവും നിയന്ത്രിക്കാം. ഇവ അധികമായാൽ രക്തസമ്മർദം ഉയരാം. 
∙ പതിവാക്കാം പരിശോധനകൾ: വീട്ടിൽ തന്നെയോ ഡോക്ടറുടെ അടുത്തു പോയോ പതിവായി ചെക്കപ്പ് നടത്താം.