ഇതിനായി എന്തൊക്കെയാണ് ആവശ്യമെന്ന് നോക്കാം

250 ഗ്രാം വറ്റൽമുളക്,

500 ഗ്രാം മല്ലി,

50 ഗ്രാം ഉലുവ,

50 ഗ്രാം തുവരപ്പരിപ്പ്,

100 ഗ്രാം കടലപ്പരിപ്പ്,

50 ഗ്രാം പീസ് പരിപ്പ്

50 ഗ്രാം പച്ചരി

20 ഗ്രാം കായം

10 തണ്ട് കറിവേപ്പില

എന്നിവ വൃത്തിയാക്കി വെയിലിൽ ഉണക്കിയെടുക്കുക.

ഇനി തയ്യാറാക്കേണ്ടത് എങ്ങിനെയാണെന്ന് നോക്കാം

നല്ല വിസ്താരമുള്ള ചുവടുകട്ടിയുള്ള പാത്രമാണ് വറക്കാൻ പറ്റിയത്. ഓടുകൊണ്ടുള്ള ഉരുളി, വലിയ ഇരുമ്പ് ചീനച്ചട്ടി മുതലായവ നന്നായിരിക്കും. മുളക് ഒട്ടും കരിഞ്ഞുപോകാതെ, ഒടിച്ചാൽ ഒടിയുന്ന പാകത്തിൽ വറുത്തെടുക്കുക. ഗ്യാസിലാണ് വറുക്കുന്നതെങ്കിൽ ഇടയ്ക്കിടെ ഗ്യാസ് ഓഫ് ചെയ്തിട്ട് ഇളക്കിക്കൊണ്ടിരുന്നാൽ ഒട്ടും കരിഞ്ഞുപോവില്ല. മുളക് മൂത്താലുടൻ ഒരു മുറത്തിലോ പത്രക്കടലാസിലോ നിരത്തുക. അതേ ഉരുളിയിൽ മല്ലിയിട്ട് തുടരെ ഇളക്കുക. പതുക്കെ ചുവന്നാൽ മുളകിന്റെ കൂട്ടത്തിലേക്ക് ചേർക്കുക. കൈയിൽ രണ്ടു മല്ലിയെടുത്ത് വിരൽകൊണ്ട് ഞെരിച്ചാൽ പൊടിയുന്ന പാകത്തിലായിരിക്കും പതുക്കെ ചുവക്കുമ്പോൾ, പരിപ്പുകൾ ഓരോന്നും വേറെ വേറെ വറക്കണം. 50 ഗ്രാം പച്ചരി പൊട്ടുന്ന പാകത്തിൽ വറുത്തെടുക്കണം. ഉലുവ നന്നായി ചുവക്കണം. കറിവേപ്പില ഒടിച്ചാൽ ഒടിയുന്ന പാകത്തിലും. കായം വറുക്കാൻ ഉരുളി വേണ്ട.

20 ഗ്രാം കായം കഷണങ്ങളാക്കി മുറിച്ച ശേഷം ഒരു ഇരുന്വുചട്ടുകത്തിൽ തീയിൽ കാണിക്കണം. അപ്പോൾ അത് നന്നായി പൊള്ളിവരും. രണ്ടു വശവും പൊളളിച്ച് മറ്റു ചേരുവകളിലേക്കിടുക. പരിപ്പുകളും ഒരു ചെറിയ ചീനച്ചട്ടിയിൽ വറുത്താൽ മതി. ഇങ്ങനെ പ്രത്യേകം പ്രത്യേകം വറുത്ത എല്ലാ സാധനങ്ങളും വീണ്ടും ഒന്നിച്ച് ഉരുളിയിലിട്ട് ഇളക്കി ഒന്നുകൂടി ചൂടാക്കണം.. ഇത് വാങ്ങി വച്ച് നന്നായി തണുത്താൽ മില്ലിൽ പൊടിപ്പിക്കാം. മില്ലിൽ നന്നായി പൊടിഞ്ഞ് കിട്ടും. മിക്‌സിയിൽ അത്രയും നന്നായി പൊടിയുകയില്ല. ഈ പൊടി മൂന്നോ നാലോ പോളിത്തീൻ കൂടുകളിലാക്കി സീൽ ചെയ്ത് ഫ്രിഡ്ജിൽ സൂക്ഷിക്കാം. ആവശ്യത്തിന് ഒരു കൂടു മാത്രം പൊട്ടിച്ച് ഉണങ്ങിയ കുപ്പിയിലിട്ട് അടച്ച് ഉപയോഗത്തിനായി വയ്ക്കാം. ഇങ്ങനെ സൂക്ഷിച്ചാൽ എട്ടുപത്തു മാസം ഒരു കേടും സംഭവിക്കുകയില്ല.