ചപ്പാത്തിക്കൊപ്പം കഴിക്കാൻ ഈ കറി ഉണ്ടാക്കിയാലോ ?

 ആവശ്യമായ ചേരുവകൾ

പനീർ - 200 ഗ്രാം (ചെറിയ സമചതുര കഷ്ണങ്ങളാക്കിയത്)

സവാള - 1 ഇടത്തരം

വെളുത്തുള്ളി - 4-5 അല്ലി

ഇഞ്ചി - ഒരു ചെറിയ കഷ്ണം

ഗ്രാമ്പൂ - 2 എണ്ണം

കറുവപ്പട്ട - ഒരു ചെറിയ കഷ്ണം

പെരുംജീരകം - 1/2 ടീസ്പൂൺ

ജീരകം - 1/2 ടീസ്പൂൺ

കശുവണ്ടി - 10-12 എണ്ണം (കുറഞ്ഞത് 15 മിനിറ്റ് കുതിർത്തത്)

കസ്കസ് (പോപ്പി സീഡ്സ്) - 1 ടേബിൾസ്പൂൺ (കുറഞ്ഞത് 15 മിനിറ്റ് കുതിർത്തത്)

പാൽ - 1 കപ്പ്

വെള്ളം - 1/2 കപ്പ് (അല്ലെങ്കിൽ ആവശ്യത്തിന്)

ഉപ്പ് - ആവശ്യത്തിന്

ഫ്രഷ് പീസ് (പച്ച പയർ) - 1/2 കപ്പ്

കസൂരി മേത്തി - 1 ടീസ്പൂൺ

തയാറാക്കുന്ന വിധം

ആദ്യം, സവാള, വെളുത്തുള്ളി, ഇഞ്ചി, ഗ്രാമ്പൂ, കറുവപ്പട്ട, പെരുംജീരകം, ജീരകം, കുതിർത്ത കശുവണ്ടി, കുതിർത്ത കസ്കസ് എന്നിവ ഒരു മിക്സിയുടെ ജാറിൽ ഇട്ട് നന്നായി അരച്ചെടുക്കുക. വെള്ളം ചേർക്കാതെ അരയ്ക്കാൻ ശ്രമിക്കുക. ആവശ്യം വന്നാൽ മാത്രം അൽപം വെള്ളം ചേർത്ത് നല്ല മൃദവായ പേസ്റ്റ് ഉണ്ടാക്കുക. അരച്ചെടുത്ത പേസ്റ്റ് ഒരു പാനിലേക്ക് ഒഴിക്കുക. ഇത് ചെറുതീയിൽ ഇട്ട് ഇളക്കി, പച്ചമണം മാറുന്നത് വരെ ചൂടാക്കുക. എണ്ണ ഉപയോഗിക്കാത്തതുകൊണ്ട്, അടിയിൽ പിടിക്കാതെ ശ്രദ്ധിക്കണം.

ഇതിലേക്ക് പാലും വെള്ളവും ചേർത്ത് നന്നായി ഇളക്കി യോജിപ്പിക്കുക. ഗ്രേവിക്ക് ആവശ്യമായ ഉപ്പും ചേർത്ത് തിളപ്പിക്കാൻ വെക്കുക. ഗ്രേവി തിളച്ച് കുറുകി വരുമ്പോൾ, ഫ്രഷ് പീസ് ചേർത്ത് വേവിക്കുക. പീസ് വെന്തു കഴിഞ്ഞാൽ പനീർ കഷ്ണങ്ങൾ കൂടി ചേർത്ത് ഒന്ന് ചൂടാക്കിയെടുക്കുക.

ഏറ്റവും അവസാനം, കസൂരി മേത്തി കൈവെള്ളയിൽ വെച്ച് ചെറുതായി പൊടിച്ച് കറിക്ക് മുകളിൽ വിതറുക. എണ്ണയില്ലാത്ത ഈ മട്ടർ മലായ് പനീർ ചപ്പാത്തി, പൂരി, അല്ലെങ്കിൽ ചോറിനൊപ്പം കഴിക്കാവുന്നതാണ്.