ഓന്തിനെപ്പോലെ നിറംമാറുന്ന, രുചിയേറും മണിപ്പൂരി പായസം; ഇനി വീട്ടിലും തയാറാക്കാം

ചേരുവകൾ

1 കപ്പ് ചക്-ഹാവോ അരി(കറുത്ത അരി)

4 കപ്പ് പാൽ

1/2 കപ്പ് പഞ്ചസാര

1/4 ടീസ്പൂൺ ഏലക്ക പൊടി

ഒരു നുള്ള് കുങ്കുമപ്പൂവ്

അലങ്കാരത്തിനായി കുറച്ച് നട്സ്

ഉണ്ടാക്കുന്ന വിധം

ചാക്-ഹാവോ അരി ഒഴുകുന്ന വെള്ളത്തിനടിയിൽ വെച്ച് നന്നായി കഴുകുക, ഏകദേശം 30 മിനിറ്റ് വെള്ളത്തിൽ മുക്കിവച്ച ശേഷം, നന്നായി ഊറ്റിക്കളയുക. ചുവട് കട്ടിയുള്ള ഒരു പാത്രത്തിൽ, കുതിർത്ത അരിയും 2 കപ്പ് വെള്ളവും ചേർക്കുക. ഇടത്തരം ചൂടിൽ തിളപ്പിക്കുക.

വെള്ളം തിളച്ചു തുടങ്ങിയാൽ, തീ ചെറുതാക്കി പാൻ മൂടുക. അരി മൃദുവാകുന്നതുവരെ വേവിക്കുക. മറ്റൊരു സോസ്പാനില്‍, പാൽ ഇടത്തരം ചൂടിൽ പാല്‍ തിളപ്പിക്കുക. അടിയിൽ പറ്റിപ്പിടിക്കാതിരിക്കാൻ ഇടയ്ക്കിടെ ഇളക്കുക. അരി വെന്തു കഴിഞ്ഞാൽ തിളച്ചു വരുന്ന പാലിൽ ചേർത്ത് നന്നായി ഇളക്കുക. തീ കുറച്ചു വയ്ക്കാന്‍ പ്രത്യേകം ശ്രദ്ധിക്കണം. ഇതിലേക്ക് പഞ്ചസാര ചേർത്ത്, പായസം ക്രീമി ആകുന്നതുവരെ ഇളക്കുക.

ശേഷം പായസത്തിലേക്ക് ഏലക്കാപ്പൊടിയും കുങ്കുമപ്പൂവും ചേർക്കുക. തീയിൽ നിന്ന് ഇറക്കിവെച്ച് നന്നായി തണുക്കാന്‍ വിടുക. തണുത്തു കഴിഞ്ഞാൽ, പായസം സെർവിംഗ് ബൗളുകളിലേക്ക് മാറ്റി  ഇഷ്ടമുള്ള നട്സ് മുകളില്‍ വിതറി അലങ്കരിക്കുക.