വീട്ടിൽ ഈസിയായി തയ്യാറാക്കാം അപ്പവും മുട്ടറോസ്റ്റും

 

ചേരുവകള്‍

1. അരിപ്പൊടി- 1 കപ്പ്
2. തേങ്ങ ചിരകിയത്- ഒന്നര കപ്പ്
3. ചോറ്- അരക്കപ്പ്
4. പഞ്ചസാര- അര ടേബിള്‍ സ്പൂണ്‍
5. മുട്ട- ഒരെണ്ണം
6. വെള്ളം- ഒന്നേകാല്‍ കപ്പ്
7. സോഡാപൊടി- കാല്‍ ടീ സ്പൂണ്‍
8. ഉപ്പ്- ആവശ്യത്തിന്

തയാറാക്കുന്ന വിധം

മുട്ടയും പഞ്ചസാരയും മിക്സിയില്‍ അടിച്ച് ഇതിലക്ക് അരിപ്പൊടിയും തേങ്ങയും ചോറും വെള്ളവും ചേര്‍ത്ത് അരച്ചെടുക്കുക. ഉപ്പും സോഡാപ്പൊടിയും ചേര്‍ത്ത് മിക്സ് ചെയ്തശേഷം പാലപ്പച്ചട്ടിയില്‍ ചുട്ടെടുക്കാം

മുട്ടറോസ്റ്റ്

നല്ല എരിവുള്ള മുട്ട റോസ്റ്റും കൂട്ടി അപ്പം കഴിക്കുന്നതൊന്ന് ആലോചിച്ചു നോക്കിക്കേ. ആലോചിക്കുമ്പോഴേ വായില്‍ വെള്ളമുറുന്നുണ്ടല്ലേ. അപ്പത്തിനു മാത്രമല്ല ചോറിനും ചപ്പാത്തിക്കുമൊക്കെ പറ്റിയ കറിയാണ് മുട്ട റോസ്റ്റ്. എന്നാപ്പിന്നെ ഇന്നു തന്നെ ഉണ്ടാക്കി നോക്കി നോക്കാം നല്ല എരിവുള്ള മുട്ട റോസ്റ്റ്.

ചേരുവകള്‍

മുട്ട - 4 പുഴുങ്ങിയത്
പച്ചമുളക് - 8
സവാള - 4 അരിഞ്ഞത്
തക്കാളി - 2 അരിഞ്ഞത്
ഇഞ്ചി - ഒരു ചെറിയ കഷണം
വെളുത്തുള്ളി - 5 അല്ലികള്‍
മുളകുപൊടി - 1 ടേബിള്‍ സ്പൂണ്‍
മല്ലിപ്പൊടി - 1 ടേബിള്‍ സ്പൂണ്‍
കുരുമുളകുപൊടി - ഒന്നര ടേബിള്‍ സ്പൂണ്‍
ഗരം മസാലപ്പൊടി - 1 ടീ സ്പൂണ്‍
എണ്ണ - ആവശ്യത്തിന്
കറിവേപ്പില - ആവശ്യത്തിന്
ഉപ്പ് - ആവശ്യത്തിന്

തയ്യാറാക്കുന്ന വിധം

ആദ്യം തന്നെ പാനില്‍ എണ്ണ ചൂടാക്കുക. എണ്ണ നന്നായി ചൂടായിക്കഴിഞ്ഞാല്‍ നേരത്തേ അരിഞ്ഞു വച്ചിരിക്കുന്ന സവാളയും ഇഞ്ചിയും പച്ചമുളകും വെളുത്തുള്ളിയും കറിവേപ്പിലയും ചേര്‍ത്ത് നന്നായി വഴറ്റുക. ചേരുവകള്‍ വഴന്നു വരുമ്പോഴേക്കും ഉപ്പ് ചേര്‍ക്കാം.

ഉപ്പു ചേര്‍ത്ത് നന്നായി ഇളക്കിയ ശേഷം ഇതിലേക്ക് തക്കാളിയും കൂടി ചേര്‍ത്ത് നന്നായി വഴറ്റിയെടുക്കുക. അടുത്തതായി പൊടികള്‍ എല്ലാം ചേര്‍ക്കുക. പൊടികള്‍ നന്നായി മൂത്തുവരുമ്പോഴേക്കും പുഴുങ്ങിയ മുട്ട ചേര്‍ത്ത് ഇളക്കി അഞ്ചു മിനിറ്റ് അടച്ചുവച്ച് വേവിക്കുക.

അഞ്ചു മിനിറ്റിനു ശേഷം അടപ്പു തുറന്നു മുട്ട അരപ്പുമായി നന്നായി ഇളക്കിച്ചര്‍ക്കുക. എരിവുള്ള നല്ല നാടന്‍ മുട്ട റോസ്റ്റ് തയ്യാര്‍.