പഞ്ചസാരയുടെ ഉപയോഗം കുറയ്ക്കാൻ ശ്രമിച്ചിട്ടുള്ളവർക്കറിയാം, ആദ്യത്തെകുറച്ചു ദിവസങ്ങൾ ഏറെ പ്രയാസകരമായിരിക്കും. പഞ്ചസാര വേണ്ട എന്ന് എത്രത്തോളം ചിന്തിക്കുന്നുവോ, അത്രത്തോളം തീവ്രമായിരിക്കും അത് കഴിക്കാനുള്ള ആഗ്രഹവും. എന്നാൽ വിഷമിക്കേണ്ട, ഈ ഘട്ടം താൽക്കാലികം മാത്രമാണ്. നിങ്ങളുടെ ശരീരത്തിൽ എന്താണ് സംഭവിക്കുന്നതെന്ന് കൃത്യമായി മനസ്സിലാക്കിയാൽ നോ-ഷുഗർ എന്ന ലക്ഷ്യം വളരെ എളുപ്പത്തിൽ കൈവരിക്കാൻ സാധിക്കും.

ജസ്‌‌‌‌‌‌‌‌‌‌‌‌‌‌ലോക ഹോസ്പിറ്റൽ ആൻഡ് റിസർച്ച് സെന്ററിലെ കൺസൾട്ടന്റ് ന്യൂട്രീഷ്യനിസ്റ്റ് സോണൽ ചന്ദാലിയയുടെ അഭിപ്രായത്തിൽ, ശരീരം പുതിയ മാറ്റങ്ങളുമായി പൊരുത്തപ്പെട്ടു വരുന്നതുകൊണ്ടാണ് തുടക്കത്തിൽ ഇത്തരം ആസക്തികൾ ഉണ്ടാകുന്നത്. "ശരീരം നിരന്തരം ഷുഗർ ഷോട്ടുകൾ സ്വീകരിക്കുന്നതിനും ഊർജ്ജത്തിനായി അൽപം പഞ്ചസാര ഉപയോഗിക്കുന്നതിനും ശീലിച്ചുപോയിരിക്കുന്നു."

പഞ്ചസാരയുടെ അളവ് കുറയുമ്പോൾ ശരീരം പ്രതികരിക്കുന്നു. "ശരീരം ഒരുതരം അടിമത്തത്തിലായിരുന്നു, അതിനാൽ സ്വാഭാവികമായും അത് പിൻവാങ്ങൽ പ്രക്രിയയിലൂടെ കടന്നുപോകുന്നു." ഇതിനാലാണ് തുടക്കത്തിൽ ആസക്തി വർദ്ധിക്കുന്നത്. എന്നാൽ ശരീരം മെറ്റബോളിസം പുനഃക്രമീകരിക്കുന്നതോടെ ഇത് കുറയുന്നു.

കർശനമായ നിയന്ത്രണത്തിന് പകരം പകരക്കാരെ കണ്ടെത്താം

മധുരം പൂർണ്ണമായും ഒഴിവാക്കുന്നതിന് പകരം മികച്ച ബദലുകളിൽ ശ്രദ്ധ കേന്ദ്രീകരിക്കുക. "ശരിയായ ബദൽ മാർഗങ്ങൾ തിരഞ്ഞെടുക്കുന്നതിലൂടെ പഞ്ചസാരയോടുള്ള ആസക്തി ബുദ്ധിപൂർവ്വം കുറയ്ക്കാൻ കഴിയും," എന്നാണ് സോണൽ പറയുന്നത്.

ഉദാഹരണത്തിന് പഴങ്ങൾ അല്ലെങ്കിൽ വീട്ടിൽ തയ്യാറാക്കിയ വിഭവങ്ങൾ. "പഴങ്ങൾ കഴിക്കുന്നതോ അല്ലെങ്കിൽ വീട്ടിൽ ഉണ്ടാക്കിയ കൊഴുപ്പ് കുറഞ്ഞ പാൽ ഉപയോഗിച്ചുള്ള മധുരം ചേർക്കാത്ത ഡെസേർട്ടുകളോ ഉപയോഗിക്കുന്നത് ഈ ആസക്തി കുറയ്ക്കാൻ സഹായിക്കും," എന്ന് സോണാൽ നിർദ്ദേശിക്കുന്നു. ചെറിയൊരു കഷ്ണം ഡാർക്ക് ചോക്ലേറ്റ് കഴിക്കുന്നതും ആസക്തിയെ തൃപ്തിപ്പെടുത്താൻ സഹായിക്കും.

"ഇത്തരം സാഹചര്യങ്ങളിൽ നമുക്ക് മധുരം നിഷേധിക്കപ്പെടുന്നു എന്ന തോന്നൽ ഉണ്ടാവില്ല. ക്രമേണ ഈ ആരോഗ്യകരമായ ഓപ്ഷനുകൾ നമ്മുടെ ദൈനംദിന ഭക്ഷണക്രമത്തിന്റെ ഭാഗമായി മാറും," എന്ന് ഡോ. സോണൽ വ്യക്തമാക്കുന്നു.

അമിതമായി കഴിക്കുന്നത് തടയാം

ആസക്തികളെ നിയന്ത്രിക്കുന്നത് ഭക്ഷണത്തിൽ മാത്രം ഒതുങ്ങുന്ന ഒന്നല്ല, അത് ദിനചര്യയുമായും ബന്ധപ്പെട്ടിരിക്കുന്നു. "ആദ്യമായി, ആരോഗ്യകരമായ സ്രോതസ്സുകളിൽ നിന്നുള്ള ചെറിയ അളവിലുള്ള മധുരം കഴിക്കുന്നതിൽ നിന്ന് സ്വയം വിലക്കേണ്ടതില്ല," എന്ന് സോണൽ പറയുന്നു. കാരണം ഇത് നിയന്ത്രണങ്ങൾ മൂലമുണ്ടാകുന്ന മാനസിക വിഷമം കുറയ്ക്കാൻ സഹായിക്കും.

ഭക്ഷണം കൃത്യമായി പ്ലാൻ ചെയ്യുന്നതും സഹായിക്കും. "പ്രധാന ഭക്ഷണത്തിന് മുമ്പായി സാലഡും സൂപ്പും കഴിക്കുന്ന ശീലം വിശപ്പ് കുറയ്ക്കാനും കൂടുതൽ സമയം വയർ നിറഞ്ഞതായി തോന്നിക്കാനും സഹായിക്കും," എന്നാണ് സോണലിന്റെ അഭിപ്രായം. 

മറ്റൊരു ഉപയോഗപ്രദമായ തന്ത്രം സമയക്രമമാണ്. എപ്പോഴാണ് സാധാരണയായി മധുരം കഴിക്കാൻ തോന്നുന്നത് എന്ന് തിരിച്ചറിയുകയും, ആ സമയത്തിന് തൊട്ടുമുമ്പ് ലഘുഭക്ഷണം കഴിക്കുകയും ചെയ്യുന്നത് അമിതമായി കഴിക്കുന്നത് തടയാൻ സഹായിക്കും.

ശരിയായ ലഘുഭക്ഷണങ്ങൾ തിരഞ്ഞെടുക്കുക

    ഇരുന്ന് ജോലി ചെയ്യുന്നവർക്ക് സ്മാർട്ട് സ്നാക്കിംഗ് വളരെ പ്രധാനമാണ്. കുറഞ്ഞ പഞ്ചസാരയുള്ളതും കോംപ്ലക്സ് കാർബോഹൈഡ്രേറ്റ് അടങ്ങിയതുമായ ലഘുഭക്ഷണങ്ങൾ ഇത്തരക്കാർക്ക് ഭക്ഷണക്രമത്തിൽ ഉൾപ്പെടുത്താം.
    വറുത്ത കടല, മഖാന, ഹോൾ വീറ്റ് ഖാക്ര, പഴങ്ങൾ, മുളപ്പിച്ച ധാന്യങ്ങൾ, അല്ലെങ്കിൽ ചെറിയ അളവിൽ നട്ട്സ് എന്നിവ രക്തത്തിലെ പഞ്ചസാരയുടെ അളവ് വർദ്ധിപ്പിക്കാതെ തന്നെ വിശപ്പ് മാറ്റാൻ സഹായിക്കും.
    അതേസമയം, പാക്കറ്റ് ഭക്ഷണങ്ങളെക്കുറിച്ച് ജാഗ്രത പാലിക്കുക. "പഞ്ചസാരയില്ലാത്ത റെഡി പാക്കേജ്ഡ് ഭക്ഷണങ്ങൾ ശരിയായ ബദലുകളല്ല. കാരണം അവയിൽ ആരോഗ്യകരമല്ലാത്ത മറ്റ് ഘടകങ്ങൾ അടങ്ങിയിട്ടുണ്ടാകാം, ഇത് നിങ്ങളെ തെറ്റിദ്ധരിപ്പിക്കാൻ സാധ്യതയുണ്ട്."