കെൻ കരുണാസ് നായകനായും സംവിധായകനായും അരങ്ങേറ്റം കുറിക്കുന്ന ‘യൂത്ത്’ എന്ന ചിത്രത്തിന്റെ ട്രെയ്‌ലർ പുറത്തിറങ്ങി. കൗമാരപ്രായക്കാരുടെ പ്രണയവും സ്കൂൾ ജീവിതവും പ്രമേയമാക്കിയ ഈ ചിത്രം കേരളത്തിലെ തിയേറ്ററുകളിൽ എത്തിക്കുന്നത് ദുൽഖർ സൽമാന്റെ ഉടമസ്ഥതയിലുള്ള വേഫറെർ ഫിലിംസ് ആണ്. മലയാളത്തിന്റെ പ്രിയ താരം സുരാജ് വെഞ്ഞാറമൂട് ഈ ചിത്രത്തിൽ കെന്നിന്റെ അച്ഛനായി പ്രധാന വേഷത്തിൽ എത്തുന്നു എന്ന പ്രത്യേകതയുമുണ്ട്. മാർച്ച് 19-നാണ് ചിത്രം ആഗോളതലത്തിൽ റിലീസ് ചെയ്യുന്നത്.

മലയാളി താരം അനിഷ്മ അനിൽകുമാർ നായികയാകുന്ന ഈ ചിത്രം ഒരു പക്കാ ടീനേജ് റൊമാന്റിക് കോമഡി ഡ്രാമയാണ്. സ്കൂൾ പഠനം പൂർത്തിയാക്കുന്നതിന് മുൻപ് തന്റെ യഥാർത്ഥ പ്രണയിനിയെ കണ്ടെത്താൻ ശ്രമിക്കുന്ന ഒരു പതിനഞ്ചുകാരന്റെ രസകരമായ യാത്രയാണ് സിനിമയുടെ ഇതിവൃത്തം. പ്രണയവും വിരഹവും ഒരു യുവാവിന്റെ കാഴ്ചപ്പാടുകളെയും പക്വതയെയും എങ്ങനെ സ്വാധീനിക്കുന്നു എന്ന് ഹാസ്യത്തിന്റെ അകമ്പടിയോടെ ചിത്രം ചർച്ച ചെയ്യുന്നു. രണ്ട് മണിക്കൂർ 24 മിനിറ്റാണ് സിനിമയുടെ ദൈർഘ്യം.

ജി.വി. പ്രകാശ് കുമാറിന്റെ സംഗീതവും വിക്കിയുടെ ഛായാഗ്രഹണവും ചിത്രത്തിന്റെ മാറ്റ് കൂട്ടുന്നു. പാർവത എന്റർടൈൻമെന്റിന്റെ ബാനറിൽ പത്ത് കോടി രൂപ ബഡ്ജറ്റിൽ ഒരുക്കിയ ഈ ചിത്രം തമിഴിന് പുറമെ മറ്റ് ഭാഷകളിലും ശ്രദ്ധിക്കപ്പെടുമെന്നാണ് പ്രതീക്ഷ. ദേവദർശിനി, മീനാക്ഷി ദിനേശ് തുടങ്ങിയവരും മറ്റു പ്രധാന വേഷങ്ങളിൽ എത്തുന്നു. ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ അവസാന ഘട്ടത്തിലാണ്.