ചെന്നൈ: തുടർ വിജയങ്ങളുമായി ബോക്സ് ഓഫീസിൽ സമാനതകളില്ലാത്ത തിരിച്ചുവരവ് നടത്തിയിരിക്കുകയാണ് തമിഴ് സൂപ്പർതാരം സൂര്യ. ജിത്തു മാധവൻ സംവിധാനം ചെയ്ത പുതിയ ചിത്രം 'സീൻ' (Scene) കൂടി 200 കോടി ക്ലബ്ബിൽ ഇടംനേടിയതോടെ, ഒരൊറ്റ വർഷത്തിനുള്ളിൽ മൂന്ന് 200 കോടി സിനിമകൾ സ്വന്തമാക്കുന്ന ആദ്യ തമിഴ് നടനെന്ന അപൂർവ റെക്കോർഡ് സൂര്യ തന്റെ പേരിലാക്കി.

റിലീസ് ചെയ്ത് ആദ്യ ആഴ്ച തന്നെ 100 കോടി ക്ലബ്ബിലെത്തിയ 'സീൻ' വരും ദിവസങ്ങളിലും വൻ കുതിപ്പാണ് തുടർന്നത്. സൂര്യയുടെ കരിയറിലെ ഏറ്റവും വലിയ ഹിറ്റായി മാറിയ 'കറുപ്പ്' (310 കോടി) എന്ന ചിത്രത്തിനൊപ്പം എത്താനായില്ലെങ്കിലും, തൊട്ടുമുൻപ് ഇറങ്ങിയ 'വിശ്വനാഥ് ആൻഡ് സൺസി'നെ (209 കോടി) മറികടക്കാൻ 'സീനി'ന് സാധിക്കുമെന്നാണ് വിലയിരുത്തൽ.

ഈ വർഷം പുറത്തിറങ്ങിയ സൂര്യയുടെ മൂന്ന് ചിത്രങ്ങളും ആഗോളതലത്തിൽ 200 കോടിയിലധികം കളക്ഷൻ നേടിയവയാണ്. 'കറുപ്പ്' 310 കോടിയും, 'വിശ്വനാഥ് ആൻഡ് സൺസ്' 209 കോടിയും നേടിയതിന് പിന്നാലെയാണ് 'സീൻ' 200 കോടി പിന്നിട്ടിരിക്കുന്നത്.തമിഴിൽ ഈ നേട്ടം സ്വന്തമാക്കുന്ന ആദ്യ നടനായ സൂര്യ, ഇന്ത്യൻ സിനിമയിൽ ഈ റെക്കോർഡ് നേടുന്ന മൂന്നാമത്തെ മാത്രം നടനാണ്. നേരത്തെ 2019-ൽ അക്ഷയ് കുമാറും, 2023-ൽ ഷാരൂഖ് ഖാനുമാണ് ഒരൊറ്റ വർഷം മൂന്നോ അതിലധികമോ 200 കോടി ചിത്രങ്ങൾ സ്വന്തമാക്കിയത്. ഇതിൽ ഷാരൂഖ് ഖാന് രണ്ട് 1000 കോടി ചിത്രങ്ങളുണ്ടായിരുന്നു എന്നതും ശ്രദ്ധേയമാണ്.

ഈ അപൂർവ നേട്ടം ഈ വർഷം ആദ്യം സ്വന്തമാക്കിയത് മലയാളി താരം മമിത ബൈജുവാണ്. രണ്ട് ഭാഷകളിലായി മൂന്ന് 200 കോടി ചിത്രങ്ങളാണ് മമിതയ്ക്ക് ഈ വർഷം ലഭിച്ചത്. തമിഴിൽ 'ജനനായകൻ', 'വിശ്വനാഥ് ആൻഡ് സൺസ്' എന്നീ ചിത്രങ്ങളും, മലയാളത്തിൽ 'ബെത്‌ലഹേം കുടുംബ യൂണിറ്റു'മാണ് മമിതയ്ക്ക് ഈ നേട്ടം സമ്മാനിച്ചത്. ഇതിൽ 'ജനനായകനും' 'ബെത്‌ലഹേം കുടുംബ യൂണിറ്റും' 300 കോടി ക്ലബ്ബിലും ഇടം നേടി.

ആഗോള ഗ്രോസ് 200 കോടി പിന്നിട്ട 'സീൻ' ഇന്ത്യയിൽ നിന്ന് ഇതുവരെ 111 കോടി രൂപയാണ് സ്വന്തമാക്കിയത്. കേരളത്തിൽ നിന്ന് മാത്രമായി ചിത്രം 25 കോടി രൂപ നേടിക്കഴിഞ്ഞു. മികച്ച പ്രേക്ഷക പ്രതികരണം തുടരുന്ന ചിത്രം അധികം വൈകാതെ 300 കോടി ക്ലബ്ബിലെത്തുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ.