ഇന്ത്യൻ കളക്ഷനിൽ 500 കോടി കടന്ന്  ‘സ്പൈഡർമാൻ: ബ്രാൻഡ് ന്യൂ ഡേ’ 

 ബോക്സ് ഓഫീസിൽ വൻ തരംഗം സൃഷ്ടിച്ചുകൊണ്ട് ഹോളിവുഡ് ചിത്രം ‘സ്പൈഡർമാൻ: ബ്രാൻഡ് ന്യൂ ഡേ’ ഇന്ത്യൻ കളക്ഷനിൽ 500 കോടി രൂപ കടന്നു. ജൂലൈ 30-ന് റിലീസ് ദിനത്തിൽ 73 കോടി രൂപ നേടി റെക്കോർഡിട്ട ചിത്രം, ഒരു ഹോളിവുഡ് സിനിമയ്ക്ക് ഇന്ത്യയിൽ ലഭിക്കുന്ന എക്കാലത്തെയും വലിയ ഓപ്പണിംഗാണ് സ്വന്തമാക്കിയത്. തുടർ ദിവസങ്ങളിലും ബോക്സ് ഓഫീസിൽ പണം വാരിയ ചിത്രം നിലവിൽ ചരിത്രനേട്ടത്തിലാണ് എത്തിനിൽക്കുന്നത്. ചിത്രത്തിന്റെ വിതരണക്കാരായ സോണി പിക്ചേഴ്സാണ് ഈ വിവരങ്ങൾ പുറത്തുവിട്ടത്.

ഞായറാഴ്ച ബുക്ക് മൈ ഷോയിൽ മണിക്കൂറിൽ 60,000-ത്തിലധികം ടിക്കറ്റുകൾ വിറ്റഴിഞ്ഞത് ചിത്രത്തിന് ഇന്ത്യയിലുള്ള വൻ ജനപ്രീതി തെളിയിക്കുന്നു. കൊളംബിയ പിക്ചേഴ്സ്, മാർവൽ സ്റ്റുഡിയോസ്, പാസ്കൽ പിക്ചേഴ്സ് എന്നിവർ ചേർന്ന് നിർമ്മിച്ച ചിത്രം ഡെസ്റ്റിൻ ഡാനിയൽ ക്രെറ്റണാണ് സംവിധാനം ചെയ്തിരിക്കുന്നത്. ക്രിസ് മക്കെന്ന, എറിക് സോമേഴ്സ് എന്നിവരാണ് ചിത്രത്തിന്റെ രചന നിർവ്വഹിച്ചിരിക്കുന്നത്.

ടോം ഹോളണ്ട് വീണ്ടും സ്പൈഡർമാനായി എത്തിയ ചിത്രത്തിൽ സെൻഡയ, സാഡി സിങ്ക്, ജേക്കബ് ബറ്റാലൺ, ജോൺ ബേൺതാൽ, ഫ്ലോറൻസ് പ്യൂ, മാർക്ക് റുഫാലോ തുടങ്ങി വൻ താരനിര തന്നെ അണിനിരക്കുന്നുണ്ട്. ടിക്കറ്റ് കൗണ്ടറുകളിൽ റെക്കോർഡുകൾ തിരുത്തിക്കുറിച്ചുള്ള സ്പൈഡർമാന്റെ ഈ കുതിപ്പ് ഹോളിവുഡ് സിനിമകൾക്ക് ഇന്ത്യൻ വിപണിയിലുള്ള സ്വാധീനം വ്യക്തമാക്കുന്നതാണ്.