ധുരന്ധർ വൻ തിയറ്റർ വിജയമായി മാറിയതിന് പിന്നാലെ, ചിത്രത്തിന് മുൻപുണ്ടായിരുന്ന തന്റെ കരിയറിലെ പ്രയാസമേറിയ ഘട്ടത്തെക്കുറിച്ച് തുറന്നുപറഞ്ഞ് നടൻ രൺവീർ സിംഗ്. സിനിമാ മേഖലയിൽ ഉയർച്ചകളും താഴ്ചകളും സ്വാഭാവികമാണെന്ന് വ്യക്തമാക്കിയ താരം, ആ ഘട്ടത്തിൽ തന്നെ പിന്തുണച്ച അംബാനി കുടുംബത്തോടുള്ള നന്ദിയും പങ്കുവച്ചു. ആദിത്യ ധർ സംവിധാനം ചെയ്ത ധുരന്ധർ ആഗോളതലത്തിൽ വലിയ വിജയം നേടിയതിന്റെ പശ്ചാത്തലത്തിലാണ് രൺവീറിന്റെ പ്രതികരണം.

റിലയൻസ് ഇൻഡസ്ട്രീസിനായി തയ്യാറാക്കിയ പുതിയ വീഡിയോയിലാണ് താരം തന്റെ കരിയറിലെ ഈ ഘട്ടത്തെക്കുറിച്ച് സംസാരിച്ചത്. “Career hai, ups and downs hote rehte hain” എന്നായിരുന്നു രൺവീറിന്റെ വാക്കുകൾ. കരിയർ എല്ലായ്പ്പോഴും ഒരേ രീതിയിൽ മുന്നോട്ട് പോകില്ലെന്നും ഉയർച്ചകൾക്കും താഴ്ചകൾക്കും ശേഷമാണ് യാത്ര മുന്നേറുന്നതെന്നും അദ്ദേഹം സൂചിപ്പിച്ചു.

ആദിത്യ ധറിന്റെ സംവിധാനത്തിൽ ജിയോ സ്റ്റുഡിയോസും B62 സ്റ്റുഡിയോസും ചേർന്നാണ് ധുരന്ധർ ഒരുക്കിയത്. വലിയ തോതിൽ നിർമിച്ച ചിത്രത്തിന് ലഭിച്ച പിന്തുണ കരിയറിലെ ബുദ്ധിമുട്ടേറിയ ഘട്ടത്തിൽ ഏറെ പ്രധാനപ്പെട്ടതായിരുന്നുവെന്നും രൺവീറിന്റെ പ്രതികരണത്തിൽ നിന്ന് വ്യക്തമാകുന്നു. ചിത്രത്തിന്റെ വിജയത്തോടെ താരത്തിന്റെ കരിയറിലും പുതിയ വഴിത്തിരിവാണ് ഉണ്ടായത്.

അതേസമയം ധുരന്ധർ വിജയത്തിന് പിന്നാലെ രൺവീർ സിംഗിന്റെ അടുത്ത ചിത്രമായ പ്രലയ് ആണ് ശ്രദ്ധ നേടുന്നത്. ജയ് മേത്ത സംവിധാനം ചെയ്യുന്ന പോസ്റ്റ്-അപോകലിപ്റ്റിക് സോംബി സർവൈവൽ ത്രില്ലറിൽ കല്യാണി പ്രിയദർശനാണ് സഹതാരം. അനന്യ ബിർളയുടെ ബിർള സ്റ്റുഡിയോസ്, ഹൻസൽ മേത്തയുടെ ട്രൂ സ്റ്റോറി ഫിലിംസ്, രൺവീറിന്റെ സ്വന്തം ബാനറായ മാ കസം ഫിലിംസ് എന്നിവർ ചേർന്നാണ് ചിത്രം നിർമിക്കുന്നത്. വി.എഫ്.എക്സ് പ്രാധാന്യമുള്ള ചിത്രത്തിന്റെ ഷൂട്ടിങ് മുംബൈ ഉൾപ്പെടെയുള്ള യഥാർഥ ലൊക്കേഷനുകളിലാണ് നടക്കുന്നത്.