തെലുങ്ക് സൂപ്പർതാരം രാം ചരൺ നായകനായി തീയേറ്ററുകളിൽ തരംഗം സൃഷ്ടിച്ച പാൻ ഇന്ത്യൻ ബിഗ് ബഡ്ജറ്റ് ചിത്രം ‘പെ​ഡി’ ഒടിടി റിലീസിന് ഒരുങ്ങുന്നു. റിലീസിന് പിന്നാലെ ഉയർന്നുവന്ന സമ്മിശ്ര വിമർശനങ്ങളെ അപ്പാടെ കാറ്റിൽപ്പറത്തിയാണ് ചിത്രം ബോക്‌സ് ഓഫീസിൽ 400 കോടി രൂപയുടെ ആഗോള ഗ്രോസ് കളക്ഷൻ വാരിക്കൂട്ടിയത്. ഈ വർഷം ഒരു തെന്നിന്ത്യൻ സിനിമ നേടുന്ന ഏറ്റവും ഉയർന്ന ആഗോള കളക്ഷൻ എന്ന റെക്കോർഡും ഇതോടെ ഈ ചിത്രം സ്വന്തമാക്കി. തീയേറ്ററുകളിൽ വിജയക്കുതിപ്പ് തുടരുന്നതിനിടയിലാണ് ചിത്രം പ്രമുഖ ഒടിടി പ്ലാറ്റ്‌ഫോമായ നെറ്റ്ഫ്ലിക്സിലൂടെ ജൂലൈ 16 മുതൽ സ്ട്രീമിങ് ആരംഭിക്കുമെന്ന റിപ്പോർട്ടുകൾ പുറത്തുവരുന്നത്.

ദേശീയ അവാർഡ് ജേതാവായ ബുചി ബാബു സന സംവിധാനം ചെയ്ത ‘പെ​ഡി’, രാം ചരണിന്റെ കരിയറിലെ ഏറ്റവും വലിയ സോളോ ഹിറ്റായി മാറിക്കഴിഞ്ഞു. വൃദ്ധി സിനിമാസിന്റെ ബാനറിൽ വെങ്കട സതീഷ് കിലാരു നിർമ്മിച്ച്, മൈത്രി മൂവി മേക്കേഴ്സും സുകുമാർ റൈറ്റിങ്‌സും ചേർന്ന് അവതരിപ്പിച്ച ഈ ചിത്രം തെലുങ്ക് സംസ്ഥാനങ്ങൾക്ക് പുറമെ വിദേശത്തും റെക്കോർഡ് കളക്ഷനാണ് നേടിയത്. കേരളത്തിലും തമിഴ്‌നാട്ടിലും തിങ്ക് സ്റ്റുഡിയോസ് വഴിയാണ് ചിത്രത്തിന്റെ മലയാളം, തമിഴ് പതിപ്പുകൾ പ്രദർശനത്തിന് എത്തിച്ചിരുന്നത്. ആക്ഷൻ, റൊമാൻസ്, ഇമോഷൻ എന്നിവയ്‌ക്കൊപ്പം ക്രിക്കറ്റ്, ഗുസ്തി, ഓട്ടം തുടങ്ങിയ കായിക ഇനങ്ങൾക്കും ചിത്രത്തിൽ ഏറെ പ്രാധാന്യമുണ്ട്.

ബോളിവുഡ് സുന്ദരി ജാൻവി കപൂർ നായികയായി എത്തിയ ചിത്രത്തിൽ കന്നഡ സൂപ്പർതാരം ശിവരാജ് കുമാറും ഒരു പ്രധാന വേഷത്തിൽ എത്തിയിട്ടുണ്ട്. രാം ചരണും ശിവരാജ് കുമാറും ആദ്യമായി ഒന്നിച്ച ചിത്രം കൂടിയാണിത് എന്ന പ്രത്യേകതയുമുണ്ട്. ഇവർക്ക് പുറമെ ബോളിവുഡ് താരം ദിവ്യേന്ദു ശർമ്മ, ജഗപതി ബാബു, ബോമൻ ഇറാനി തുടങ്ങിയ വൻ താരനിരയാണ് ചിത്രത്തിൽ അണിനിരന്നത്. തെലുങ്ക്, തമിഴ്, കന്നഡ, മലയാളം, ഹിന്ദി എന്നീ അഞ്ച് ഭാഷകളിലായി തീയേറ്ററുകളിൽ കണ്ട് ആസ്വദിക്കാൻ സാധിക്കാത്തവർക്ക് ജൂലൈ പകുതിയോടെ ഇനി ഈ ദൃശ്യവിരുന്ന് നെറ്റ്ഫ്ലിക്സിലൂടെ സ്വന്തം സ്ക്രീനുകളിൽ ആസ്വദിക്കാം.