മമ്മൂട്ടിയും മോഹൻലാലും നീണ്ട പതിനെട്ട് വർഷങ്ങൾക്ക് ശേഷം വെള്ളിത്തിരയിൽ ഒന്നിക്കുന്നു എന്ന സവിശേഷതയോടെ എത്തുന്ന ‘പേട്രിയറ്റ്’ നാളെ തിയേറ്ററുകളിൽ പ്രദർശനത്തിന് തയ്യാറെടുക്കുകയാണ്. ചിത്രത്തിന്റെ റിലീസിന് മുന്നോടിയായി ബി ഉണ്ണികൃഷ്ണൻ പങ്കുവെച്ച ആശംസകൾ ഇപ്പോൾ സോഷ്യൽ മീഡിയയിൽ ശ്രദ്ധേയമായി മാറിക്കഴിഞ്ഞു. ഏകദേശം 125 കോടി രൂപയ്ക്ക് മുകളിൽ നിർമ്മാണച്ചെലവ് വന്ന ഈ ബൃഹദ് ചിത്രം മലയാള സിനിമയുടെ വാണിജ്യ സമവാക്യങ്ങളെയും സങ്കൽപ്പങ്ങളെയും പൊളിച്ചെഴുതുമെന്നും, മഹേഷ് നാരായണന്റെ ഈ വലിയ സ്വപ്നത്തിന് കരുത്തായി നിന്ന നിർമ്മാതാവ് ആന്റോ ജോസഫിന്റെ ധീരമായ പരിശ്രമങ്ങൾ അഭിനന്ദനാർഹമാണെന്നും അദ്ദേഹം തന്റെ കുറിപ്പിലൂടെ ഓർമ്മിപ്പിക്കുന്നു.

ആന്റോ ജോസഫ് എന്ന നിർമ്മാതാവ് നേരിട്ട പ്രതിസന്ധികളെക്കുറിച്ചും ഈ പ്രോജക്റ്റിനായി അദ്ദേഹം കാണിച്ച ദൃഢനിശ്ചയത്തെക്കുറിച്ചും ഉണ്ണികൃഷ്ണൻ ഹൃദ്യമായി സംസാരിക്കുന്നുണ്ട്. ‘എമ്പുരാൻ’ എന്ന ചിത്രത്തിലൂടെ ആന്റണി പെരുമ്പാവൂർ നടത്തിയതിന് സമാനമായ ഒരു വലിയ വഴിമാറി നടക്കലാണ് ആന്റോ ജോസഫും ഈ ചിത്രത്തിലൂടെ നിർവ്വഹിച്ചിരിക്കുന്നത്. ഫഹദ് ഫാസിൽ, കുഞ്ചാക്കോ ബോബൻ, നയൻതാര തുടങ്ങി വൻ താരനിരയും മികച്ച സാങ്കേതിക പ്രവർത്തകരും അണിനിരക്കുന്ന ഈ ചിത്രം സമകാലിക രാഷ്ട്രീയവും സ്വകാര്യതയെക്കുറിച്ചുള്ള ഗൗരവകരമായ നിരീക്ഷണങ്ങളും ചർച്ച ചെയ്യുന്ന ഒന്നായിരിക്കുമെന്നും അദ്ദേഹം വ്യക്തമാക്കുന്നു.

സിനിമയിലെ എല്ലാ സാങ്കേതിക പ്രവർത്തകരും ‘പേട്രിയറ്റിന്’ ഒപ്പം നിൽക്കണമെന്നും മലയാള സിനിമയുടെ അതിരുകൾ വികസിപ്പിക്കുന്ന ഇത്തരം ശ്രമങ്ങൾ വിജയിക്കേണ്ടത് അത്യാവശ്യമാണെന്നും അദ്ദേഹം കുറിപ്പിൽ കൂട്ടിച്ചേർത്തു. പ്രേക്ഷകരോട് ഒരു പ്രത്യേക അഭ്യർത്ഥനയും ബി ഉണ്ണികൃഷ്ണൻ മുന്നോട്ടുവെക്കുന്നുണ്ട്; യാതൊരുവിധ മുൻവിധികളുമില്ലാതെ ഈ സിനിമയെ സ്വീകരിക്കുകയും ഒരു മികച്ച തിയേറ്റർ അനുഭവമായി ഇതിനെ ഏറ്റെടുക്കുകയും ചെയ്യുക. മഹേഷ് നാരായണനും ആന്റോ ജോസഫിനും ചിത്രത്തിലെ മറ്റ് അണിയറ പ്രവർത്തകർക്കും പൂർണ്ണമായ വിജയമാശംസിച്ചുകൊണ്ടാണ് അദ്ദേഹം വാക്കുകൾ അവസാനിപ്പിക്കുന്നത്.