ചില ​ഗാനങ്ങൾ കാലത്തിന് അതീതമാണ്. ഇറങ്ങി വർഷങ്ങൾക്കുശേഷമാവും അതിന്റെ യഥാർത്ഥ മൂല്യം ആസ്വാദകർ മനസിലാക്കുക. പറഞ്ഞുവരുന്നത് ഒരു മലയാള​ഗാനത്തേക്കുറിച്ചാണ്. 2009-ൽ പുറത്തിറങ്ങിയ മൈ ബി​ഗ് ഫാദർ എന്ന ചിത്രത്തിലെ ഒരു ​ഗാനം യൂട്യൂബിൽ 50 മില്യണിലേറെ കാഴ്ചക്കാരെയും സ്വന്തമാക്കി കുതിപ്പ് തുടരുകയാണ്.

യേശുദാസ് ആലപിച്ച നിറതിങ്കളേ നറു പൈതലേ എന്ന ​ഗാനമാണ് യൂട്യൂബിൽ അപ്രതീക്ഷിത പ്രകടനം കാഴ്ചവെച്ചത്. നിലവിൽ 53 മില്യണിലേറെയാണ് ​ഗാനത്തിന്റെ വ്യൂസ്. വയലാർ ശരത്ചന്ദ്ര വർമ എഴുതിയ ​ഗാനം അലക്സ് പോൾ ആണ് ഈണിട്ടത്. ​ഗിന്നസ് പക്രുവും ഇന്നസെന്റുമാണ് ​ഗാനരം​ഗത്തിലുള്ളത്.

ഉയരക്കുറവുള്ള അച്ഛന്റെയും ഉയരമുള്ള മകന്റെയും ആത്മബന്ധത്തിന്റെ കഥയാണ് മഹേഷ് പി. ശ്രീനിവാസൻ സംവിധാനംചെയ്ത മൈ ബി​ഗ് ഫാദർ പറഞ്ഞത്. ​ഗിന്നസ് പക്രു അച്ഛൻ വേഷത്തിലെത്തിയപ്പോൾ മകനായെത്തിയത് ജയറാമായിരുന്നു. അച്ഛന് മകനോടുള്ള വാത്സല്യമാണ് ​ഗാനത്തിൽ ചിത്രീകരിച്ചിരിക്കുന്നത്.

വിദേശികളാണ് ഈ ​ഗാനം ഇത്രയേറെ ഹിറ്റാക്കിയതെന്നതാണ് ഏറെ ശ്രദ്ധേയം. എപി മലയാളം സോങ്സ് എന്ന യൂട്യൂബ് ചാനലിൽ അപ് ലോഡ് ചെയ്ത വീഡിയോയുടെ കമന്റ് സെക്ഷൻ മുഴുവൻ വിദേശികളാണ് കയ്യടിക്കിയിരിക്കുന്നത്. പല വിദേശഭാഷകളിലുള്ള കമന്റുകളാണ് ഏറെയും. ​ഗാനരം​ഗത്തിലുള്ളത് യഥാർത്ഥ അച്ഛനും മകനുമാണ് എന്നാണ് വിദേശികളായ പലരും ധരിച്ചിരിക്കുന്നത്. കമന്റുകൾ പരിശോധിച്ച മറ്റുചിലർ ഇത് സിനിമാ ​ഗാനമാണെന്നും ​ഗിന്നസ് പക്രുവെന്നാണ് നടന്റെ പേര് എന്നും കമന്റ് ചെയ്തിട്ടുണ്ട്.

കനിഹയായിരുന്നു നായിക. സുരാജ് വെഞ്ഞാറമ്മൂട്, സലിം കുമാർ, ബാബുരാജ് തുടങ്ങിയവരായിരുന്നു മറ്റുപ്രധാനവേഷങ്ങളിൽ. സതീഷ് കെ. ശിവൻ, സുരേഷ് മേനോൻ എന്നിവരുടേതാണ് തിരക്കഥ. പി.എ. സെബാസ്റ്റ്യനാണ് ചിത്രം നിർമിച്ചത്.