കാർത്തി ചിത്രം 'മെയ്യഴഗനി'ൽ പിന്നണി ഗായകനായി കമൽഹാസൻ

കാർത്തി, അരവിന്ദ് സ്വാമി എന്നിവരെ പ്രധാന കഥാപാത്രങ്ങളാക്കി സി പ്രേം കുമാർ സംവിധാനം ചെയ്യുന്ന ചിത്രമാണ് 'മെയ്യഴഗൻ'. സെപ്റ്റംബർ 27-നാണ് ചിത്രം തീയറ്ററുകളിലെത്തുക. കമൽ ഹാസൻ പിന്നണി ഗായകനാകുന്നു എന്ന പ്രത്യേകതയും മെയ്യഴഗനുണ്ട്.

മൊത്തം ആറ് ഗാനങ്ങളാണ് ചിത്രത്തിലുള്ളത്. അവയിൽ രണ്ടെണ്ണം പാടിയിരിക്കുന്നത് കമൽഹാസനാണ്. 'യാരോ ഇവൻ യാരോ' എന്ന തുടങ്ങുന്ന ഗാനം ഉമ ദേവി രചിച്ച് ഗോവിന്ദ് വസന്ത കമ്പോസ് ചെയ്തിരിക്കുന്നതാണ്. വിജയ് നരേനൊപ്പം 'പോരേൻ നാൻ പോരേൻ' എന്ന ഗാനവും കമൽഹാസൻ പാടിയിട്ടുണ്ട്.

96 എന്ന സൂപ്പർ ഹിറ്റ് ചിത്രത്തിനു ശേഷം സി പ്രേം കുമാർ സംവിധാനം ചെയ്യുന്ന മെയ്യഴഗൻ ജ്യോതികയുടെയും സൂര്യയുടെയും നിർമ്മാണ കമ്പനിയായ 2 ഡി എന്റർടൈൻമെന്റ്സാണ് നിർമിക്കുന്നത്. ശ്രീദിവ്യയാണ് ചിത്രത്തിൽ നായികയായി എത്തുന്നത്. 

രാജ് കിരൺ, ദേവദർശിനി, ശ്രീരഞ്ജിനി, ജയപ്രകാശ്, ഇളവരസു, കരുണാകരൻ, ശരൺ ശക്തി, രാജ്കുമാർ, തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.