മലയാളത്തിന്റെ സ്വന്തം മോഹൻലാലും തമിഴകത്തിന്റെ ദളപതി വിജയിയും ആദ്യമായി ഒന്നിച്ചെത്തിയ ഹിറ്റ് ചിത്രം ‘ജില്ല’ വീണ്ടും തിയേറ്ററുകളിലേക്ക്. 2014-ൽ പുറത്തിറങ്ങിയ ഈ ആക്ഷൻ എന്റർടൈനർ, വിജയിയുടെ പിറന്നാൾ ദിനമായ ജൂൺ 19-ന് വമ്പൻ റീ-റിലീസിനൊരുങ്ങുകയാണ്. തമിഴ്നാടിന് പുറമെ കേരളത്തിലും ചിത്രത്തിന് വലിയ സ്വീകാര്യതയാണ് പ്രതീക്ഷിക്കുന്നത്.

ആർ.ടി. നേസൻ സംവിധാനം ചെയ്ത ചിത്രം സൂപ്പർഗുഡ് ഫിലിംസിന്റെ ബാനറിൽ ആർ.ബി. ചൗധരിയാണ് നിർമ്മിച്ചത്. ശിവൻ, ശക്തി എന്നീ കഥാപാത്രങ്ങളായി മോഹൻലാലും വിജയിയും തകർത്താടിയ ചിത്രം ബോക്സ് ഓഫീസിൽ വലിയ വിജയമായിരുന്നു. വിജയിയുടെ ‘ഗില്ലി’, ‘പോക്കിരി’ തുടങ്ങിയ ചിത്രങ്ങളുടെ റീ-റിലീസുകൾ വലിയ വിജയം കൈവരിച്ച പശ്ചാത്തലത്തിൽ, ‘ജില്ല’യ്ക്കും സമാനമായ വരവേൽപ്പ് ലഭിക്കുമെന്നാണ് സിനിമാ ലോകം ഉറ്റുനോക്കുന്നത്.

അതേസമയം, മറ്റൊരു ചിത്രമായ ‘ജനനായകൻ’ റിലീസ് ചെയ്യാൻ സാധിക്കാത്ത സാഹചര്യത്തിൽ പകരം ‘ജില്ല’ റിലീസ് ചെയ്യുന്നത് ആരാധകർക്കിടയിൽ നേരിയ നിരാശ പടർത്തിയിട്ടുണ്ട്. സെൻസർ സർട്ടിഫിക്കറ്റ് ലഭിക്കാത്തതിനെ തുടർന്ന് കോടതി കയറേണ്ടി വന്ന ‘ജനനായകൻ’ നേരിടുന്ന കുരുക്കുകൾ ഇതുവരെ അഴിഞ്ഞിട്ടില്ല. ഈ സാഹചര്യത്തിലാണ് പ്രേക്ഷകരുടെ പ്രിയപ്പെട്ട ‘ജില്ല’ വീണ്ടും തിയേറ്ററുകളിലെത്തുന്നത്.