പവൻ കല്യാൺ നായകനായി എത്തിയ ചിത്രമാണ് ഹരി ഹര വീര മല്ലു. ചിത്രത്തിന് സമ്മിശ്ര പ്രതികരണമാണ് പ്രേക്ഷകരിൽ നിന്ന് ലഭിക്കുന്നത്. സാധാരണ 50 കോടി വാങ്ങിക്കുന്ന താരം ഈ ചിത്രത്തിനായി കേവലം 15 കോടി മാത്രമാണ് പ്രതിഫലമായി സ്വീകരിച്ചത് എന്നാണ് റിപ്പോർട്ട് സൂചിപ്പിക്കുന്നത്. രണ്ട് ദിവസം കൊണ്ട് ചിത്രം 67 കോടി രൂപയാണ് ആഗോള ബോക്സ് ഓഫീസിൽ നിന്ന് നേടിയത് എന്നാണ് ട്രേഡ് അനലിസ്റ്റുകളായ സാക്നിൽക്കിന്റെ റിപ്പോർട്ട്. കൃഷ് ജഗർലമുഡിയും ജ്യോതി കൃഷ്‍യും ആണ് ചിത്രത്തിൻ്റെ സംവിധാനം നിർവ്വഹിച്ചിരിക്കുന്നത്.

ചിത്രം വിദേശത്ത് നിന്ന് മാത്രം 11 കോടിയും നേടിയിട്ടുണ്ട്. നിധി അഗർവാളാണ് ചിത്രത്തിൽ നായികയായി എത്തുന്നത്. ജ്ഞാന ശേഖർ വി എസാണ് ചിത്രത്തിന്റെ ഛായാഗ്രാഹണം നിർവ്വഹിച്ചിരിക്കുന്നത്. എ ദയകർ റാവുവാണ് ചിത്രം നിർമിച്ചിരിക്കുന്നത്. മെഗാ സൂര്യ പ്രൊഡക്ഷൻസിന്റെ ബാനറിലാണ് ചിത്രത്തിന്റെ നിർമാണം. എം എം കീരവാണിയാണ് സംഗീത സംവിധാനം നിർവ്വഹിച്ചിരിക്കുന്നത്. അർജുൻ രാംപാൽ, നർഗീസ് ഫഖ്രി, ആദിത്യ മേനോൻ, പൂജിത പൊന്നാഡ എന്നിവരും ഹരി ഹര വീര മല്ലുവിൽ ഉണ്ട്.